Pune News: वेळेच्या आधी आलेला माॅन्सून, चांगल्या पावसाचा अंदाज आणि शेतकऱ्यांची शेतीत गुंतवणुकीला पसंती यामुळे मे २०२५ मध्ये भारतातील ट्रॅक्टर विक्री ९.१२ टक्क्याने वाढली. मे महिन्यात ९० हजार ५०० ट्रॅक्टर्स विकले गेले. गेल्यावर्षी याच महिन्यात ८२ हजार ९३४ ट्रॅक्टर्स विकले होते. 

यंदा देशात वेळेच्या आधी माॅन्सून दाखल झाला. शेतकऱ्यांनी पेरणीची तयारी सुरु केली. त्यासाठी ट्रॅक्टर्ससह इतर शेती आवजारेही खरेदी केली केली. माॅन्सूनबरोबरच सरकारच्या काही योजनांमुळेही ट्रॅक्टरची मागणी वाढली आहे.

ट्रॅक्टर कंपन्यांनी सांगितले की, किमान आधारभूत किंमतीत वाढ, जलाशयांमधील पाण्याची चांगली पातळी आणि नव्या सरकारी योजनांमुळे ग्रामिण भागात सकारात्मक वातावरण निर्माण झाले. यामुळे शेतकरी पेरणीच्या हंगामापूर्वी ट्रॅक्टर्स खरेदी करत आहेत.

महिंद्रा अँड महिंद्राच्या शेती अवजारे विभागाचे अध्यक्ष वीजय नाक्रा म्हणाले, की वेळेवर पाऊस पडल्याने अनेक भागांत भातशेतीची तयारी चांगली सुरू आहे. भात आणि इतर खरीप पिकांसाठी वाढलेल्या हमीभावामुळे शेतकऱ्यांचा गुंतवणूक करण्यासाठी विश्वास वाढला आहे, ज्यामुळे येत्या काही महिन्यांत ट्रॅक्टर विक्री आणखी वाढू शकते.

महिंद्रा अँड महिंद्रा कंपनीने मे २०२५ मध्ये ३८ हजार ९१४ ट्रॅक्टर्स विकले, गेल्या वर्षीच्या तुलनेत  विक्रीत १०.४४ टक्के वाढ झाली. महिंद्राचे शेती अवजारे विभागाचे कार्यकारी संचालक राजेश जेजुरीकर म्हणाले, की जागतिक मंदीमुळे आंतरराष्ट्रीय मागणी कमी आहे. परंतु देशांतर्गत विक्री चांगली आहे.

एस्कॉर्ट्स कुबोटा लिमिटेडने मे २०२५ मध्ये ९ हजार ७०३ ट्रॅक्टर्स विकले. गेल्या वर्षीच्या तुलनेत विक्री १.९५ टक्क्याने कमी. कंपनीने सांगितले, की तात्पुरत्या चढ-उतारांमुळे देशांतर्गत विक्रीवर परिणाम झाला. पण पुढे चांगला पाऊस झाला, धरणांमुळे चांगला पाणीसाठा आणि ग्रामीण अर्थव्यवस्थेची उलाढाल वाठल्यानंतर परिस्थिती सुधारेल. 

इंटरनॅशनल ट्रॅक्टर्स लिमिटेड (सोनालिका ब्रँड) ने मे २०२५ मध्ये सर्वकालीन उच्चांक गाठला. कंपनीने १४ हजार २१३ ट्रॅक्टर्स विकले. ज्यात देशांतर्गत आणि निर्यातीचा समावेश आहे. देशांतर्गत बाजारात सोनालिकाने ११ हजार ८१२ ट्रॅक्टर्स विकले, मे २०२४ मधील ११ हजार १३१ विक्री होती. सोनालिका देशांतर्गत आणि निर्यात बाजारात आपला विस्तार करत आहे.