Pune News : ‘‘खरीप हंगाम २०२३ साठी ई-पीक पाहणी मोबाईल ॲपद्वारे पीक पाहणी नोंदीची अंतिम मुदत १५ सप्टेंबर आहे. मात्र, अॅपद्वारे नोंदी करण्यासाठी अनेक ठिकाणी नेटवर्कचे अडथळे येत आहेत. त्यामुळे नोंदी होण्यासाठी वेळ लागत आहे. त्यामुळे अनेक शेतकरी या नोंदींपासून वंचित आहेत. शेतकऱ्यांच्या तक्रारी वाढल्या असून या नोंदी ऑफलाइन कराव्यात, अशी मागणी शेतकऱ्यांमधून जोर धरू लागली आहे.

नैसर्गिक आपत्तीमुळे पिकांचे नुकसान झाल्यास ई-पीक पाहणीची नोंद असताना नुकसान भरपाई अचूक व लवकर मिळण्यासाठी ही नोंद आवश्यक आहे. आत्तापर्यंत खरीप हंगाम २०२३ मध्ये आतापर्यंत २४ हजार ९२० खातेदारांनी २४ हजार ६२८ हेक्टर आर क्षेत्रावर मोबाईल ॲपद्वारे पीक पाहणीच्या नोंदी केल्या आहेत. जिल्ह्यातील शेतकऱ्यांनी विहित मुदतीत पीक पाहणीची नोंद करावी, असे आवाहन करण्यात आले होते. परंतु सर्व्हर डाउनमुळे पीक नोंदणी होत नसल्याची स्थिती आहे.

पीक पेरणी अहवालाचा रिअल टाइम क्रॉप डाटा संकलित होण्यासाठी ई-पीक पाहणी महत्त्वाची आहे. माहिती संकलित करताना पारदर्शकता येते. पीक पेरणी अहवाल प्रक्रियेत शेतकऱ्यांच्या सक्रिय सहभागामुळे कृषी पत पुरवठा सुलभ होतो. पीक विमा आणि पीक पाहणी दावे निकाली काढण्याची प्रक्रिया सुलभ होते. ॲपवर नोंद असल्यास शासनाच्या विविध योजनांचा लाभ घेण्यास कोणतीही अडचण येणार नाही. त्यामुळे उर्वरित खातेदारांनी दिलेल्या मुदतीत मोबाईल ॲपद्वारे पीक पाहणी करणे गरजेचे आहे.