Ahilyanagar News : जिल्ह्यात गेल्या आठ ते दहा दिवसापासून पावसाने उघडीप दिली आहे. त्यामुळे सुरु असलेल्या खरिपाच्या पेरण्याला काहीसा ब्रेक लागला आहे. पेरलेली पिके सुकू लागल्याने शेतकऱ्यांत चिंता वाढली आहे. अनेक भागात दुबार पेरणी करावी लागते की काय याची चिंता शेतकऱ्यांना लागली आहे.

अहिल्यानगर जिल्ह्यात यंदा मे महिन्यात अवकाळी पावसाने सुरुवात केल्याने पावसाळा सुरु होण्याआधीच मशागतीची कामे झाले. शेतकऱ्यांनी यंदा दरवर्षीच्या तुलनेत १५ दिवस लवकर पेरण्या केल्या. मात्र आता गेल्या आठ दिवसापासून पावसाने उघडीप दिली आहे. त्यामुळे पेरलेले उगवण्याला काही भागात अडचणी येत असल्याने शेतकऱ्यांना दुबार पेरणी करावी लागते की काय? याची चिंता सातावू लागली आहे.

अहिल्यानगर जिल्ह्यात यंदा ७ लाख १६ हजार २०९ हेक्टर सरासरी क्षेत्र असून यंदा आतापर्यंत ३ लाख हेक्टरच्यावर पेरण्या झाल्या आहेत. पाथर्डी तालुक्यात सर्वाधिक सरासरीच्या ७८ टक्के तर पारनेर तालुक्यात ६७ टक्के पेरण्या झाल्या आहेत. कोपरगावला सर्वात कमी म्हणजे ४ टक्के पेरणी झाली आहे.

कापसाची ७३ हजार हेक्टवर तर सोयाबीनची ६४ हजार हेक्टरवर पेरणी झाली. उडीद आणि मुगाचे क्षेत्रही बऱ्यापैकी वाढत आहे. यावर्षी मे महिन्यात अवकाळी पावसाने सुरुवात केल्याने पावसाळा सुरु होण्याआधीच मशागतीची कामे झाले. शेतकऱ्यांनी यंदा दरवर्षीच्या तुलनेत १५ दिवस लवकर पेरण्या करण्याला मदत झाली.

मात्र दोन आठवड्यापासून पावसाने पाठ फिरविल्यामुळे पेरणी केलेली पिके उगवण्यावर परिणाम होताना दिसत आहे. पावसाने उघडीत दिल्याने कोरडवाहू भागात जमिनीतील ओलावा संपत चालला आहे. त्यामुळे उगवण क्षमतेववर परिणाम आहेच, पण काही दिवसात चांगला पाऊस झाला नाही तर उगवलेलेही वाया जाण्याची शेतकऱ्यांना भीती लागली आहे.

पाणी आवकही घटली

अहिल्यानगर जिल्ह्यातील बहुतांश भागात पाऊस नसला तरी भंडारादरा धरण पाणलोट क्षेत्रात पाऊस सुरु आहे. मात्र पावसाचा जोर कमी असल्याने धरणात येणाऱ्या पाण्याची आवकही कमी झाली आहे. भंडारदरा धरणात ५३ टक्के पाणीसाठा झाला असून मुळा धरण ४५ टक्क्यापर्यंत भरले आहे.

निळवंडे धरणातही पाणीसाठा वाढत असून सध्या धरणात ४५ टक्के पाणीसाठा आहे. कर्जत तालुक्यातील दुष्काळी भागातील सीना धरण यंदा मे मधील पावसानेच भरले आहे. अकोल्यातील अंबित, पिंपळगाव खांड, कोथळे, शिरपुंजे या धरणासह टिटवी लघुबंधारा भरला आहे.