Amalnaer News : निम्न तापी प्रकल्प पाडळसरेचा निधी खेडी भोकरी पुलाला देऊ नये, त्यासाठी स्वतंत्र निधी देण्यात यावा, अन्यथा पाडळसरे धरण जनआंदोलन समितीतर्फे आंदोलन छेडण्याचा इशारा जलसंपदामंत्री गिरीश महाजन व कार्यकारी अभियंता यांना निवेदनाद्वारे देण्यात आला आहे.

निवेदनात म्हटले आहे की, खेडी भोकरी पुलासाठी १५० कोटी रुपये मंजूर करण्यात आले होते. त्यात सार्वजनिक बांधकाम विभागातर्फे ७५ कोटी व निम्न तापी प्रकल्प पाडळसरेच्या निधीतून ७५ कोटी रुपयांची तरतूद करण्यात आली होती. निम्न तापी प्रकल्पातून १५ कोटी रुपये आधीच देण्यात आले आहेत.

गेल्या अनेक वर्षांपासून निम्न तापी प्रकल्प रखडलेला आहे. दरवर्षी निधी मिळण्यासाठी मर्यादा येत असल्याने प्रकल्पाचे काम धिम्या गतीने सुरू आहे. त्यामुळे प्रकल्पाची किंमत दरवर्षी वाढत जात आहे. निधी इतरत्र वळवल्यास प्रकल्पाच्या कामावर परिणाम होतील. निधीअभावी काम लवकर थांबेल.

त्यामुळे तालुक्याच्या प्रगतीत बाधा निर्माण होईल. त्याचप्रमाणे पाडळसरेचा निधी इतरत्र खर्च झाल्यास लाभ व्येय गुणोत्तर कमी होईल. दरवर्षी साधारणतः १०० कोटींच्या आसपास निधी मिळाला आहे आणि निधी पुलाला दिल्यास धरण कसे होणार? प्रकल्पाच्या नदीपात्रातील गेटचे काम सुरू आहे, उपसा सिंचन योजनांचे पाईप लाईन टाकण्यात येत आहे. भूसंपादनाची प्रक्रिया अपूर्ण आहे. निधी पुलाला वळता केल्यास समितीतर्फे तीव्र आंदोलन छेडले जाईल, असे निवेदनात म्हटले आहे.

या निवेदनावर जनआंदोलन समितीचे अध्यक्ष सुभाष चौधरी, रणजित शिंदे, महेश पाटील, हेमंत भांडारकर, सुनील पाटील, रामराव पवार, सुशील भोईटे आदींच्या सह्या आहेत. तापी पाटबंधारे विकास महामंडळाचे कार्यकारी संचालक व मुख्य अभियंता तापी पाटबंधारे विकास महामंडळ यांनादेखील निवेदन देण्यात आले आहे.