Solapur News : यंदाच्या पावसाळ्यात मृग नक्षत्रानंतर पाठोपाठ आर्द्रा नक्षत्रातील पावसानेही निराशा केली आहे. आर्द्रा नक्षत्र सुरू होऊन उद्या (रविवार, ता. २९) एक आठवडा होत आहे. आठवड्यात सोलापूरच्या वातावरणात फारसा काही बदल झालेला नाही. उन्हाळ्याप्रमाणे उन आणि उकाडा जाणवू लागला आहे. मे मध्ये धो-धो पडलेला पाऊस जूनमध्ये गायब झाला असल्याची स्थिती सध्या जिल्ह्यात आहे.

जून महिन्यातील २६ दिवसात पावसाचे सरासरी दिवस ८ ठरले आहेत. या आठ दिवसात किरकोळ व रिमझिम पाऊस झाला आहे. या पावसामुळे शेतीला, खरिपाच्या पेरण्यांसाठी आवश्‍यक असलेल्या पोषक वातावरणाला फार काही मदत झाली नाही. पुणे जिल्ह्यात होत असलेल्या पावसामुळे उजनी धरणातील पाणी साठा झपाट्याने वाढला होता.

उजनीचा पाणीसाठा जवळपास ७७ टक्क्यांच्या आसपास गेला होता. आषाढी वारी दरम्यान उजनीत पाणी वाढल्यास जास्त पाऊस सुरू झाल्यास पूरस्थिती होऊ नये यासाठी उजनीत ६५ ते ७० टक्क्यांच्या दरम्यानच पाणीसाठा ठेवला जात आहे. त्यामुळे भीमा नदी, कालवा, बोगदा यासह अन्य योजनातून पाणी सोडले जात आहे.

आज सोलापुरात ३४ अंश सेल्सिअस कमाल तापमानाची नोंद झाली. आज सोलापुरात ६४ टक्के आर्द्रता होती. नेहमीच्या तुलनेत आज तापमानाचा पारा वाढला होता. सध्या सोलापूर शहर व जिल्ह्यात रिमझिम पाऊस लावत आहे.

या पावसात काहीच जोर नसल्याने या पावसाचा शेतीसाठी फारसा उपयोग नसल्याने मुसळधार पावसाकडे शेतकऱ्यांचे लक्ष लागले आहे. शनिवारपासून (ता. ५) सूर्याचा पुनर्वसू नक्षत्रात प्रवेश होत आहे. या प्रवेशाचे वाहन घोडा आहे. या नक्षत्रातील पावसाकडे सर्वांचे लक्ष लागले आहे.

सरासरीच्या ६१ टक्केच पाऊस

जून महिन्यात सोलापूर जिल्ह्यात सरासरी १०२.५ मिलिमीटर पाऊस होतो. आतापर्यंत जूनमध्ये सोलापूर जिल्ह्यात सरासरी ६३.३ मिलिमीटर पाऊस झाला आहे. सरासरीच्या ६१.८ टक्केच पाऊस झाला आहे. जूनच्या २६ दिवसातील पावसाचे सरासरी दिवस ८ ठरले आहेत. जूनमध्ये जिल्ह्यात सर्वाधिक १६.३ मिलिमीटर पावसाची सरासरी नोंद १३ जून रोजी झाली आहे. उर्वरित दिवसांमध्ये सरासरी पाऊस १० मिलिमीटरच्याही आत आहे.