Chh. Sambhajinagar News : नागपूर-गोवा शक्तिपीठ महामार्गासाठी आवश्यक जमिनीच्या मोजणीसाठी आधुनिक तंत्रज्ञानाचा वापर करण्यात येणार असल्याचे प्रतिपादन जमाबंदी आयुक्त सुहास दिवसे यांनी शुक्रवारी (ता. २५) येथे केले.

नागपूर-गोवा शक्तिपीठ महामार्ग बाबत आयोजित भूसंपादन कार्यशाळेतील दुसऱ्या सत्रात श्री. दिवसे बोलत होते. या वेळी विभागीय आयुक्त जितेंद्र पापळकर, महाराष्ट्र राज्य रस्ते विकास महामंडळाचे सहव्यवस्थापकीय संचालक लक्ष्मीनारायण मिश्रा उपस्थित होते.

श्री. दिवसे म्हणाले, की महामार्गासाठीच्या भूसंपादनाची प्रक्रिया गतीने पूर्ण करण्यासाठी सर्व यंत्रणांचे योगदान महत्त्वाचे आहे. शक्तिपीठ महामार्गाची मोजणी अचूक व्हावी यासाठी गतीने सीमांकन करावे, मोणार्कने मोजणी केल्यास ते आपण डिजिटलही पाहू शकतो सोबत विभागामार्फत ही मोजणी तपासता येणार आहे.

राज्यात १० हजार मोजणीदार पॅनेलवर घेण्यात येत आहेत. मोठ्या तालुक्याला १००, मध्यम तालुक्याला ५० तर लहान तालुक्याला २५ खासगी मोजणीदार देण्याचे प्रस्तावित आहे. तात्पुरत्या कच्च्या रेखांकनाची तरतूद करून त्याप्रमाणे काम केल्यास सुलभ होणार आहे.

१ कोटी ४० लाख नकाशे असून सर्व नकाशे डिजिटल स्वरूपात तयार करण्यात आले आहेत. डिजिटल प्लॅटफॉर्मवर हे नकाशे उपलब्ध आहेfत. भूमी अभिलेख विभागात मागील २५ वर्षांत वेगाने तांत्रिक बदल झाले आहेत.

मोजणीमध्ये, डिजिटायझेशन, ई-गव्हर्नस सातबारा, नकाशा आणि मोजणी असे बदल करण्यात आले असल्याचे श्री. दिवसे म्हणाले. या वेळी संबंधित यंत्रणांचे प्रमुख अधिकारी उपस्थित होते.