Akola News : नवीन विकसीत केलेले वाण शेतकऱ्यांनी वापरावे व भरपूर उत्पन्न घ्यावे, असे आवाहन ‘महाबीज’चे व्यवस्थापकीय संचालक सचिन कलंत्रे यांनी केले.

महाराष्ट्र राज्य बियाणे महामंडळाचा (महाबीज) ४८ वा वर्धापन दिन विभागीय तथा जिल्हा कार्यालयात झाला. या वेळी कलंत्रे बोलत होते. या वेळी महाबीजचे संचालक डॉ. रणजीत सपकाळ, महाराष्ट्र राज्य बीज प्रमाणीकरण यंत्रणा संचालक विजय शिराळ, महाबीजचे सर्व विभाग प्रमुख उपस्थित होते.

जिल्ह्यातील सर्व भागधारक, बीजोत्पादक, शेतकरी व महाबीज विक्रेते मोठ्या संख्येने उपस्थित होते. कार्यक्रमाचे प्रास्ताविक विभागीय व्यवस्थापक जी. जी. देशमुख यांनी केले. कार्यक्रमामध्ये भागधारक, बीजोत्पादक, प्रगतिशील शेतकरी व महाबीज बियाणे विक्रेते यांनी महाबीज करिता केलेल्या विशेष योगदानाबद्दल त्यांना सन्मानित करण्यात आले.

मागील ४८ वर्षे शेतकऱ्यांकरिता केलेल्या अविरहीत सेवेबद्दल उपस्थितांनी महाबीजबद्दल समाधान व्यक्त केले. डॉ. सपकाळ यांनी महाबीजच्या प्रगतीमध्ये भागधारक, बीजोत्पादक, शेतकरी, महाबीज विक्रेते, महाबीज अधिकारी व कर्मचारी यांचा मोलाचा वाटा असल्याचे नमूद केले.

कार्यक्रमाकरिता जिल्हा व्यवस्थापक विजय अस्वार, बीज परीक्षण अधिकारी राजेश पाटील, केंद्र अभियंता सुधीर नेमाने, इतर अधिकारी व कर्मचारी यांनी पुढाकार घेतला.