Jalgaon News : रावेर, यावल, चोपडा, अमळनेर, विदर्भातील अंजनगावसुर्जी व लगतचा भाग आणि मध्य प्रदेशातील बऱ्हाणपूर या भागासाठी तापी नदीवरील तापी मेगा रिचार्ज प्रकल्पाचे घोंगडे भिजतच आहे.

या प्रकल्पाचा सविस्तर अहवाल सर्वेक्षण व इतर बाबी पूर्ण करून तयार झाला आहे. परंतु राज्य शासन व केंद्राच्या स्तरावर कुठल्याही बैठका, प्रकल्पाबाबत सकारात्मक हालचाली सुरू नसल्याची स्थिती आहे. तत्कालीन खासदार हरिभाऊ जावळे यांनी या प्रकल्पासाठी मोठा पाठपुरावा केला. सातपुडालगतचा जळगाव जिल्ह्यातील भाग केळी पिकात आघाडीवर आहे. परंतु हा भाग घटत्या जलसाठ्यांमुळे डार्क झोनमध्ये पोहोचला.

भविष्यातील टंचाईचे संकट व इतर समस्या लक्षात घेता जावळे यांनी तापी मेगा रिचार्ज प्रकल्पासंबंधी सातत्याने पाठपुरावा केला. २०२४-१५ मध्ये या प्रकल्पासंबंधी काम सुरू झाले. राज्यातील युती सरकारने पावले उचलली. तसेच केंद्रीय स्तरावरूनही प्रतिसाद मिळाला. केंद्राने प्रयाोगिक प्रकल्प म्हणून या प्रकल्पास मान्यता दिली. तसेच निधी देण्याची तयारीही केली. तत्कालीन केंद्रीय जलसंपदामंत्री उमा भारती यांनी या प्रकल्पाची पाहणीदेखील केली होती.

नंतर या प्रकल्पाचे रडार बेस सर्वेक्षण झाले. सर्व बाबींची पूर्तता करून सविस्तर प्रकल्प अहवालही तयार झाला. तो राज्य शासनास सादर झाला. पुढे या प्रकल्पासाठी निधीची गरज आहे. परंतु त्यासाठी कुठलीही कार्यवाही होत नसल्याची स्थिती आहे. हरिभाऊ यांच्यानंतर अमोल जावळे यांनी याबाबत शासन व लोकप्रतिनिधींकडे पाठपुरावा केला. शासनाला पत्रही दिले.

परंतु कुठलीही बैठक, निर्णय याबाबत होत नसल्याची स्थिती आहे. जावळे हे युतीचे महत्त्वाचे नेते होते. पण युती सरकारमध्येच त्यांच्या प्रकल्पाबाबत अनास्था दाखविली जात असल्याने शेतकरी, जिल्ह्यातील काही लोकप्रतिनिधीदेखील नाराज आहेत. तापी मेगा रिचार्ज प्रकल्पामुळे जळगाव जिल्ह्यातील चार तालुके सुजला सुफला होतील. तसेच विदर्भातील अमरावती, बुलडाणा जिल्ह्यांतील सातपुडालगतच्या भागासही सिंचनाचे मजबूत स्रोत उपलब्ध होतील. मध्य प्रदेशलाही लाभ होईल.