jalgaon News : मूग उत्पादन यंदा कमाल शेतकऱ्यांना एकरी एक ते दीड क्विंटल एवढेच हाती येत आहे. कमी पाऊस व किडींचा प्रकोप यामुळे उत्पादकता धोक्यात आली आहे. मुगाचे उत्पादन काही शेतकऱ्यांच्या हाती आले आहे. पण खानदेशात पिकात शेंगा तोडणी, मळणीला सुरवात झाली आहे.

यंदा पाऊस उशिरा आला. ६ जुलैनंतर काही भागांत पावसाचे आगमन झाले. इतर भागात ९, १०, १३ जुलै या दरम्यान पाऊस झाला. यामुळे कडधान्यात उडीद, मुगाची पेरणी कमी झाली. खानदेशात ३० ते ३५ हजार हेक्टरवर मुगाची पेरणी अपेक्षित असते. जळगावात १६ ते १७ हजार हेक्टरवर मूग पेरणी केली जाते. परंतु यंदा मुगाची पेरणी खानदेशात ६० ते ६५ टक्केच झाली आहे.

अनेकांनी तुषार सिंचनाच्या मदतीने पीक वाढविले. केळी पट्ट्यात जळगावमधील चोपडा, यावल, रावेर, मुक्ताईनगर, धुळ्यातील शिरपूर, नंदुरबारमधील शहादा, तळोदा भागात अनेक शेतकरी बेवडसाठी मुगाची पेरणी काळ्या कसदार, मध्यम जमिनीत करतात. या शेतकऱ्यांनी तुषार सिंचनाच्या मदतीने पीक वाढविले. यातच नंतर सतत पाऊस सुरू होता. किडींचा प्रकोप झाला. किडींची समस्या व प्रतिकूल स्थिती यामुळे उत्पादकता कमी झाली. सतत महिनाभर पाऊस सुरू होता. यामुळेही पिकाची हवी तशी वाढ, विकास होऊ शकला नाही. परिणामी, उत्पादन घटले आहे.

काही शेतकऱ्यांना एकरी दोन क्विंटलपर्यंत उत्पादन मिळू शकले. परंतु कमाल शेतकऱ्यांना उत्पादन हवे तसे आलेले नाही. मुगाचे उत्पादन कमी असल्याने त्याची बाजारातील आवकही खानदेशात कमी आहे. दरवर्षी ऑगस्टच्या मध्यात आवकेत वाढ होते. परंतु यंदा काही बाजार समित्यांमध्येच आवक होत आहे. मुगाखालील क्षेत्र अनेकांनी तोडणी, मळणी करून रिकामे केले असून, त्यात कांदेबाग केळीची लागवड केली जाईल. त्याचे अवशेष तसेच शेतात शेतकरी गाडत आहेत.