Solapur News : पुणे जिल्ह्याकडील धरणांतील अतिरिक्त पाणी उजनी धरणाकडे सोडण्यात येत होते. पण तिकडील धरणांतील विसर्ग सध्या थांबवण्यात आल्याने धरणाची ६१ टक्क्यांवर पोचलेली पाणीपातळी हळूहळू घटू लागली आहे. शुक्रवारी (ता. २०) धरणाची पाणीपातळी ५८.९८ टक्क्यांवर खाली आली.

('ॲग्रोवन'चं व्हॉट्सअ‍ॅप चॅनल जॉईन करण्यासाठी येथे क्लिक करा)

यंदा पावसाने प्रदीर्घ ओढ दिल्याने सोलापूर जिल्ह्याची चिंता वाढली, पण पंधरवड्यापूर्वी पुणे जिल्ह्यात बऱ्यापैकी पाऊस झाला. परिणामी तिकडील धरणांमध्ये पुरेसा पाणीसाठा झाला. त्यानंतर तेथील अतिरिक्त पाणी सोलापूर जिल्ह्याची वरदायिनी असणाऱ्या उजनी धरणाकडे सोडण्यात येत होते.

सुरुवातीला तब्बल ४० हजार क्युसेकचा विसर्ग सोडण्यात आला. त्या बळावरच उणेत गेलेले धरण अत्यंत वेगाने अधिकमध्ये आलेच, पण पाणी पातळीही तब्बल ६१ टक्क्यांच्या घरात पोचली. पण पुण्याकडील धरणातून येणारा विसर्ग सध्या पूर्णपणे थांबवण्यात आला आहे.

त्यामळे वाढलेली पाणीपातळी पुन्हा किंचित घटू लागली आहे. शुक्रवारी पातळी ४९४.९०० मीटरपर्यंत राहिली. तर एकूण साठा ९६.१५ टीएमसी आणि त्यातील उपयुक्त साठा ३२.५० टीएमसी एवढा राहिला. तर या पाण्याची टक्केवारी ५८.९८ टक्के एवढी राहिली.