Nagar News : जिल्ह्यातील अकोले तालुक्यातील राजूर परिसरातील सहा ते सात गावांत सदोष बियाण्यांमुळे आदिवासी शेतकऱ्यांच्या भातपिकांचे नुकसान झाले आहे. जामगाव, चिंचोनडी, दिगंबर, राजूर, पिंपळगाव नाकविंदा आदी गावांतील सुमारे १३० च्या जवळपास आदिवासी शेतकऱ्यांचा सदोष बियाण्यांचा फटका बसला आहे. तालुका कृषी विभागाने पंचनामे केले असल्याचे सांगत असले तरी दोन महिन्यांनंतर दखल घेतल्याचा आरोप होत आहे.

अकोल्यात भातांचे उत्पादन घेतले जाते. यंदा काही गावांत मात्र सदोष बियाण्यांमुळे आदिवासी शेतकऱ्यांना मोठा आर्थिक फटका बसला आहे. शेतकऱ्यांनी दोन महिन्यांपूर्वी याबाबत कृषी विभागाकडे तक्रार केली होती. या शेतकऱ्यांनी राजूर येथील कृषी विक्री केंद्रातून भात बियाणे खरेदी केली होते. पिके येण्याच्या स्थितीत आल्यावर वाढीतील समतोल आणि अनेक ठोंबाना तांदूळ आला नसल्याचे स्पष्ट झाले.

त्यानंतर तक्रार करून सदोष बियाणे व भेसळयुक्त बियाणे विकलेल्या कंपनीवर व विक्रेत्यावर फसवणुकीचा गुन्हा दाखल करण्याची मागणी केली. महात्मा फुले कृषी विद्यापीठ शास्त्रज्ञ, तालुका कृषी अधिकारी व पंचायत समितीचे कृषी अधिकारी यांनी दोन दिवसांपूर्वी मोजक्याच शेतकऱ्यांच्या शेतात जाऊन पंचनामे केले.

स्वाभिमानी शेतकरी संघटनेच्या पदाधिकारी सुरेश नवले, सुनील कुंडे, सुशांत आरोटे, सागर शेळके, सोमनाथ आहेर, संतोष घोडके, संदीप सातपुते उपस्थिती होते. सदोष बियाणे विकणाऱ्या कंपनीवर गुन्हे दाखल करावेत व झालेल्या नुकसानाची भरपाई द्यावी अशी मागणी केली आहे.

केवळ आठ शेतकऱ्यांचे पंचनामे

राजूर व परिसरातील जामगाव, दिगंबर, चोडी, पिंपळगाव नाकविंदा गावांतील शेतकऱ्यांच्या भातपिकांचे सदोष बियाण्यांमुळे नुकसान झाले. १३० शेतकऱ्यांना याचा फटका बसला. दोन महिन्यांपूर्वी तक्रार दिलेली असताना कृषी विभागाने दखल घेतली नाही.

आता चार दिवसांपूर्वी भेटी देऊन पंचनामे करण्याचा दिखावा केला. त्यातही केवळ ८ ते १० शेतकऱ्यांचे पंचनामे केले. कृषी विभागाचे अधिकारी शेतकऱ्यांना न्याय देण्याऐवजी सदोष बियाणे विक्रेत्यांनी पाठीशी घालत असल्याचा आरोप शेतकऱ्यांनी केला आहे.