Banana Crop Damage In Akola : अकोला जिल्ह्यात अकोट तालुक्यात रविवारी (ता.२१) रात्री साडेदहाच्या सुमारास आलेल्या वादळ, पावसामुळे केळीच्या बागांमध्ये मोठ्या प्रमाणात झाडे कोलमडून पडली आहेत. कापणीला आलेले केळीचे घड तुटून पडल्याने शेतकऱ्यांचे मोठे नुकसान झालेले आहे.

अकोट तालुक्यातील पणज, अकोलखेड महसूल मंडळातील गावांमध्ये रात्री दहा ते साडेदहा दरम्यान जोरदार वाऱ्यासह मध्यम स्वरूपाचा पाऊस पडला. प्रामुख्याने वाऱ्याचे वेग मोठा असल्याने केळीच्या बागेत झाडे उन्मळून पडली.

गेल्या काही दिवसांपासून आधीच उष्णतापमान प्रचंड वाढलेले असून बागांना फटका बसतो आहे. त्यातच रविवारी जोरदार आलेल्या वादळानेही नुकसान केले आहे. या दोन्ही मंडळांत हजारो एकरात केळीची लागवड झालेली आहे. काही केळीमधून उत्पादन सुरू झालेले आहे.

सध्या केळीचे दर कमी असल्यानेही आधीच शेतकऱ्यांना आर्थिक झळ सहन करावी लागत आहे. त्यातच आता उष्णतामान व त्यापाठोपाठ वादळाने केळीचे नुकसान झाले आहे. शेतकऱ्यांना तातडीने मदत मिळण्याची मागणी केली जात आहे.