Buldana News: मागील खरीप हंगामातील शेवटच्या टप्प्यात ऑक्टोबरमध्ये अतिवृष्टीमुळे सोयाबीन, कापूस तसेच इतर शेतपिकांचे मोठे नुकसान झाले होते. या नुकसानीसाठी शासनाने शेतकऱ्यांना आर्थिक मदत जाहीर आहे. त्यानुसार नांदुरा तालुक्यातील ४२ हजार १८१ शेतकऱ्यांना त्यांच्या बाधित झालेल्या एकूण ४० हजार ७९० हेक्टर क्षेत्रासाठी ५५ कोटी ६८ लाख २७ हजार रुपयांचा निधी लवकरच शेतकऱ्याच्या बँक खात्यात जमा केला जाणार आहे.

बुलडाणा जिल्ह्यात विशेष करून घाटाखालील तालुक्यात खरीप हंगामाच्या शेवटच्या टप्प्यात ऑक्टोबर महिन्यात मुसळधार ते अति मुसळधार पाऊस झाला होता. त्यात नांदुरा तालुक्यात १० ते १२ ऑक्टोबरदरम्यान झालेल्या अतिवृष्टीमुळे तालुक्यातील जिरायती पिकांचे ४० हजार ६९७ हेक्टर क्षेत्रात तर १३२ शेतकऱ्यांच्या ३३ हेक्टर क्षेत्रातील फळ पिकांचे नुकसान झाले होते. दोन्ही मिळून ४२ हजार १८१ शेतकऱ्यांचे ४० हजार ७९० हेक्टर क्षेत्रातील शेतपिकांचे नुकसान झाले होते.

पावसामुळे शेतातील सोंगून ठेवलेले सोयाबीनच्या गंज्या, वेचणीस आलेला कापूस खराब होण्यासाठी नदी-नाल्यांना पूर आल्याने सोयाबीनच्या गंजी अक्षरशः वाहून गेल्या होत्या तसेच अनेकांची जमीन खरडून गेली होती. अशावेळी त्याच वेळेस शासनाने तत्काळ मदत देणे अपेक्षित होते.

परंतु त्या वेळी केवळ पंचनामे करून शेतकऱ्यांना मदतीचे आश्वासन देण्यात आले होते. मात्र, आता मागील वर्षीच्या अतिवृष्टीने झालेल्या पीक नुकसानीबाबत शेतकऱ्यांना मदत देण्यासाठी सरकारने शासन निर्णय काढून शेती पिकाच्या नुकसानीपोटी मदत देण्याचे जाहीर केले आहे. १३८०० रुपये प्रती हेक्टरप्रमाणे ही मदत वाटपाची प्रक्रिया असणार आहे.

तालुकानिहाय असे होणार निधीचे वाटप

तालुका शेतकरी संख्या क्षेत्र हेक्टर अपेक्षित निधी लाखात

बुलडाणा ९०१ ६१२.३४ १३६.८६

चिखली ३३८२ २६१२.५० ३५७.१९

मोताळा ४८१०२ ३६१७७.७६ ४९३२.९८

मलकापूर २९९६२ ३२५७६.०० ४४४१.९७

खामगाव ३९९९२ ३३९०६.५० ४६३७.८९

नांदुरा ४२१८१ ४०७९०.०० ५५६८.२७

जळगाव (जा) २७८९९ ३०८१५.०० ४१९०.८४

संग्रामपूर ३६९४० ३७२९३.०० ५२२०.६३

मेहकर ९०६ ६५८.४५ ९०.४२

सिंदखेड राजा १५९५ ९९९.०० १४८.१९