Kolhapur News : दुग्ध व्यवसाय करून जास्तीत जास्त आर्थिक नफा कमवून बेरोजगारी काही प्रमाणात कमी करणे शक्य असल्याचे प्रतिपादन डी. वाय. पाटील कृषी विज्ञान केंद्राचे पशू विज्ञान विषयाचे विषय विशेषज्ञ प्रा. सुधीर सूर्यगंध यांनी केले. ते विकसित कृषी संकल्प अभियानांतर्गत रूई (ता. हातकणंगले) येथील कार्यक्रमात बोलत होते.

उत्तम जातीच्या अधिक दूध देणाऱ्या गाई-म्हशींचे संगोपन करणे, मुक्त संचार गोठ्याची उभारणी करून कष्ट कमी करणे, सकस ओल्या व वाळलेल्या चाऱ्याचा समावेश, योग्य वेळी जनावरांचे लसीकरण व जंत निर्मूलन करणे, दुधावर प्रक्रिया करून दुग्धजन्य पदार्थांची विक्री करणे इत्यादी बाबींवर लक्ष दिल्यास योग्य व्यवस्थापन केल्यास दुग्ध व्यवसाय आर्थिकदृष्ट्या किफायतशीर होत असल्याचे प्रा. सुधीर सूर्यगंध यांनी या वेळी बोलताना सांगितले.

कृषी व शेतकरी कल्याण मंत्रालयातील वरिष्ठ विपणन अधिकारी अच्युत सुरवसे यांनी विकसित संकल्प अभियानाचा लाभ शेतकऱ्यांनी घ्यावा, असे आवाहन केले. सलीम अत्तार व विलास बेरड यांनी खरीप पिकाच्या बीजप्रक्रियेचे प्रात्यक्षिक करून दाखवले.

पिकावरील ड्रोन फवारणीची माहितीही या वेळी सांगण्यात आली. पुणे येथील फुलशेती संशोधन संचालनालयातील डॉ. अरविंद वर्मा आणि डॉ. संजय कड यांनी या वेळी शेतकऱ्यांना मार्गदर्शन केले.

महाराष्ट्र शासनाच्या विविध योजनांची माहिती कृषी पर्यवेक्षक राहुल कुलकर्णी यांनी दिली. डॉ. निनाद वाघ, सौरभ यादव प्रगतशील शेतकरी राजकुमार काश्मिरे, प्रियांका फाळके आणि नीलम खोत आदी उपस्थित होते. गंगासागर मोरे, बाजीराव पाटील, राजू माने यांनी नियोजन केले.