कांदा ः

काढणी बाकी राहिलेल्या खरीप कांद्याची त्वरित काढणी करून विक्री करावी. रब्बी कांदा रोपवाटिकेमध्ये आणि रांगडा कांद्याच्या पुनर्लागवडीमध्ये कार्बेन्डाझीम १ ग्रॅम किंवा हेक्झाकोनॅझोल १ ग्रॅम किंवा मॅन्कोझेब २.५ ग्रॅम प्रति लिटर पाणी अशी स्टिकरसह फवारणी पाऊस थांबल्यानंतर करावी. शेतात साठलेल्या पाण्यामुळे मर रोगाचा प्रादुर्भाव वाढू शकतो. त्यासाठी याच बुरशीनाशकांचे ‘ड्रेंचिंग’ करावे, असा तातडीचा सल्ला राजगुरुनगर येथील राष्ट्रीय कांदा संशोधन संचालनालयाचे संचालक विजय महाजन यांनी दिला आहे.

केळी

काही ठिकाणी कांदे बाग लागवडीमध्ये फळ काढणी सुरू असून, येथील घडांची काढणी करून त्वरित विक्री करावी. जून लागवडीच्या बागेतील झाडे शाखीय वाढीच्या अवस्थेत असून, सिगाटोका रोगाचा प्रादुर्भाव होऊ शकतो. त्यासाठी कार्बेन्डाझीम किंवा प्रोप्रीकोनॅझोल यांची शिफारशीप्रमाणे आलटून पालटून फवारणी करावी. पाऊस जास्त झाल्यास बागेत पाणी साचणार नाही याची काळजी घ्यावी.

भाजीपाला

वाटाणा पिकावर भुरी रोगाचा प्रादुर्भाव टाळण्यासाठी शिफारशीप्रमाणे उपाययोजना कराव्यात. मिरची, टोमॅटो पिकावर रस शोषणाऱ्या किडींचा तसेच बुरशीजन्य रोगांचा प्रादुर्भाव वाढू शकतो, बुरशीनाशकाची संरक्षणात्मक फवारणी करावी. नवीन लागवड केलेल्या व लहान वेलवर्गीय झाडांना काठीने आधार द्यावा.

गहू, हरभऱ्यास फायदेशीर

विदर्भात हा पाऊस सार्वत्रिक नाही. जिथे झाला आहे, तूर या खरीप आणि गहू, हरभरा अशा रब्बी पिकांना अपायकारक न राहता फायदेशीर ठरेल, असा अंदाज अकोला येथील डॉ. पंजाबराव देशमुख कृषी विद्यापीठाचे शिक्षण विस्तार संचालक डॉ. धनराज उंदिरवाडे यांनी दिला आहे.

हंगामी पिके

वसंतराव नाईक मराठवाडा कृषी विद्यापीठ, परभणी येथील ग्रामीण कृषी मौसम सेवा विभागाचे मुख्य प्रकल्प डॉ. के. के. डाखोरे यांनी दिलेला सल्ला पुढीलप्रमाणे.

कापूस : वेचणीस तयार असलेल्या कापसाची वेचणी लवकरात लवकर करावी. सुरक्षित ठिकाणी साठवणूक करावी.

तूर : पाऊस झाल्यानंतर पाणी साठून राहणार नाही याची दक्षता घ्यावी. पिकात साचलेल्या अतिरिक्त पाण्याचा निचरा करावा.