Rajsthan News: पंतप्रधान पीकविमा योजनेअंतर्गत देशभरातील ३५ लाख शेतकऱ्यांच्या बँक खात्यात ३ हजार ९०० कोटी रुपयांची थकित भरपाई सोमवारी (ता. ११) वितरित करण्यात आली. तसेच उर्वरित ७ हजार ५०० हजार कोटी रुपयांची रक्कम लवकरच वितरित करण्यात येणार आहे, अशी माहिती केंद्रीय कृषिमंत्री शिवराज सिंह चौहान यांनी दिली आहे.

राजस्थान येथील झुंझुनू येथे पीकविमा योजनेची थकित भरपाई वितरणासाठी आयोजित कार्यक्रमात सोमवारी (ता. ११) ते बोलत होते. यामध्ये रब्बी २०२२, खरीप-रब्बी २०२४ मधील पीकविमा भरपाई वितरित करण्यात आली. केंद्रीय कृषिमंत्री शिवराजसिंह चौहान यांनी थेट लाभ हस्तांतरणाच्या मदतीने कळ दाबून रक्कम शेतकऱ्यांच्या बँक खात्यावर हस्तांतरित केली. या वेळी राजस्थानचे मुख्यमंत्री भजनलाल शर्मा, कृषिमंत्री डॉ. किरोडी लाल मीना आदी उपस्थित होते.

कृषिमंत्री चौहान म्हणाले, की एका गावातील शेतकऱ्याचे नुकसान झाले तरीदेखील सरकार त्या संबंधित शेतकऱ्याला भरपाई देईल. पंतप्रधान नरेंद्र मोदींचे सरकार कायम शेतकऱ्यांच्या पाठीशी उभे आहे. अशी ग्वाही त्यांनी दिली. तसेच पंतप्रधान पीकविमा योजनेतून शेतकऱ्यांचे जीवन नैसर्गिक आपत्तींच्या संकटांपासून सुरक्षित ठेवण्याचा प्रयत्न केला जात असल्याचा दावाही कृषिमंत्र्यांनी केला.

कार्यक्रमापूर्वी समाजमाध्यमांवर प्रसिद्ध केलेल्या व्हिडिओमध्ये त्यांनी सांगितले की, नैसर्गिक आपत्तींमध्ये केवळ पीक नाही, तर शेतकऱ्यांचे जीवनही धोक्यात येते. म्हणूनच पंतप्रधान मोदी यांनी ही योजना सुरू केली असून आज ही योजना शेतकऱ्यांसाठी वरदान ठरली आहे. केंद्र सरकारने २०१६ मध्ये पंतप्रधान पीकविमा योजना सुरू केली.

या योजनेत गारपिट, पूर, दुष्काळ, चक्रीवादळ, अवकाळी पाऊस, कीड-रोग इत्यादींमुळे होणाऱ्या पिकांच्या नुकसानीसाठी विमा संरक्षण कवच देण्यात असल्याचा दावा सरकारने केला आहे. परंतु वेळेवर भरपाई मिळत नसल्याने शेतकरी संताप व्यक्त करत आहेत. कृषी मंत्रालयाच्या माहितीनुसार, जानेवारी २०२५ मध्ये केंद्रीय मंत्रिमंडळाने पंतप्रधान पीकविमा योजना आणि पुनर्रचित हवामान आधारित पीकविमा योजना २०२५-२६ पर्यंत सुरू ठेवण्यास मंजुरी दिली आहे. या योजनेसाठी केंद्र सरकारने ६९ हजार ५१५ कोटी रुपयांची तरतूद केली आहे.