Nanded News : जिल्ह्यात सलग तीन दिवसांपासून होत असलेल्या मॉन्सूनोत्तर पावसामुळे रब्बी पिकांसह फळपीक, तूर, कपाशी या पिकांनी दाणादाण उडाली आहे. पावसाचे प्रमाण अधिक असलेल्या लोहा तालुक्यातील माळाकोळी, मुखेडमधील मुखेड व चांडोळा या महसूल मंडलांत अतिवृष्टीची नोंद झाली. बुधवारी सकाळपर्यंत जिल्ह्यात सरासरी २०.९० मिलिमीटर पावसाची नोंद झाली.

नांदेड जिल्ह्यात मागील तीन दिवसांपासून मॉन्सूनोत्तर पावसाने धुमाकूळ घातला आहे. सोमवारी झालेल्या जोरदार पावसानंतर मंगळवारी पुन्हा दुपारनंतर पावसाने हजेरी लावली. हा पाऊस जिल्ह्याच्या सर्वच तालुक्यांत झाला.

या पावसाचे प्रमाण लोहा, मुखेड, बिलोली, देगलूर, कंधार, नायगाव, माहूर, मुदखेड, भोकर या तालुक्यांत सर्वाधिक होते. हा पाऊस लोहा तालुक्यातील माळाकोळी मंडलात ७९.८० मिलिमीटर, मुखेडमधील मुखेड मंडलांत ७४.८० व चांडोळा महसूल मंडलात ७०.८० मिलिमीटर नोंद झाल्यामुळे या ठिकाणी अतिवृष्टीची नोंद झाली.

यासोबतच रामतीर्थ मंडलात ६३, बिलोली ५६.८०, आदमपूर ५४.८०, शाहापूर ५२.५०, सिंदखेड ४५.८०, वाई ४३, देगलूर ४२.३०, कंधार ४२, खानापूर ४१, नरंगल ४०, अर्धापूर ३८, लोहगाव ३८, नरसी ३८ मिलिमीटर पावसाची नोंद झाली.

दरम्यान, या पावसामुळे खरिपातील तूर, कपाशी या पिकांसह रब्बीतील हरभरा, गहू या पिकांचे नुकसान झाले आहे. तर अर्धापूर तालुक्यातील पांगरी येथील फळांनी लगडलेली पपईची झाले आडवी पडली आहेत.

यासोबतच अर्धापूर तालुक्यातील भोसी शिवारात गारांचा पाऊसही झाला आहे. दरम्यान, जिल्ह्यात पुढील दोन दिवसांत पावसाचा अंदाज व्यक्त केला आहे. यामुळे रब्बी पेरणीसाठी तयार असलेल्या शेतकऱ्यांना आणखी काही दिवस थांबावे लागणार आहे.