Karad News : कृष्णा नदीत मगर असल्याची वन विभाग खात्री देत आहे. पाच वर्षांपासून येथील कृष्णा नदीत दिसणारी मगर कालपासून कोयना नदीपात्रात शहरातील शुक्रवार पेठेलगतच्या बाजूला दिसू लागली आहे.

त्यामुळे कृष्णेसोबतच आता कोयना नदीकाठावरील स्थानिकांत घबराटीचे वातावरण आहे. कोयनेच्या पात्रात पहिल्यांदाच मगरीचे दर्शन झाल्याने नागरिकांत औत्सुक्यासह भीतीचे वातावरण आहे. नागरिकांनी सावध राहावे, घाबरून जाऊ नये, असे आवाहन वन विभागाने केले आहे.

पाच वर्षांपासून वावर

कृष्णेच्या पात्रात सुमारे पाच वर्षांपासून मगर दिसते आहे. शहरी भागातही तीन वर्षांपूर्वी, तर कृष्णेच्या ग्रामीण भागात त्या आधीपासून मगरीचा वावर आहे. दुपारीच्या सुमारास कृष्णाकाठी मगर दिसते. शहरातील वाखाण भागात रानातील मळीमध्ये मगरीचे दर्शन झाल्याच्या घटना ताज्या आहेत. ती मगर तब्बल बारा फुटांची होती.

तीच मगर कोयना नदीच्या शहरातील शुक्रवार पेठेतील परिसरात फिरणाऱ्या नागरिकांना दिसली. तत्पूर्वी कृष्णेच्या मालखेड, आटके परिसरातही मगर दिसली होती. ती मगर आता शहरी भागातही दिसते आहे. आता तिचा कोयनच्या पात्रात वावर वाढल्याने घबराट आहे. रानातील मळीत मगर निवांत झोपल्याची छायाचित्रे समाज माध्यमावरही व्हायरल होत आहेत.

वन विभागाचे आवाहन

मालखेड, आटकेनंतर शहरातीलही काही भागांत विशेष करून कोयना नदीपात्रात मगर दिसल्याने कोयना व कृष्णाकाठावरील गावांत व शहरी भागात घबराटीचे वातावरण आहे. नागरिकांनी सावध राहण्याचे आवाहन वन विभागाने केले आहे. मगरीच्या दर्शनाच्या घटना घडू लागल्याने चर्चा आहे. त्यामुळे घबराटीसह खळबळ उडाली आहे.

त्यामुळे नागरिकांनी अफवांवर विश्वास ठेवू नये. नगर दिसल्यास वन विभागाला १९२६ या टोल फ्री नंबर कळवावे अथवा प्रत्यक्षात माहिती द्यावी. मगरीच्या भक्ष्याच्या यादीत अजून मनुष्य नाही. त्यामुळे मगर माणसांवर हल्ला करते, हा समज मनातून काढून टाकावा, तसेच अफवांवर विश्वास ठेवू नये.