Buldnaa News : खरीप हंगामात लावगड केलेल्या कपाशी पिकातून आता सार्वत्रिक वेचणी सुरू झाली. ग्रामीण भागात सीतादही करण्याची लगबग शेतकऱ्यांमध्ये सुरू आहे. सोयाबीनचा हंगाम तितकासा फायदेशीर नसल्याने आता शेतकरी कपाशी पिकावर आशा ठेवून आहेत.

यंदा या भागात पावसाने धुमाकूळ घातला होता. त्यामुळे सोयाबीनचा हंगाम यावर्षी पुरता लांबला आहे. आता सोयाबीन हंगाम शेवटच्या टप्प्यात आला तर कपाशीचा हंगामही सुरू होत असल्याने मजूर मिळणे कठीण बाब बनली आहे.

यावर्षी जूनमध्ये शेतकऱ्यांनी कपाशीची पेरणी केली आहे. मात्र, जुलैपासून सलग पाऊस झाला. यावर्षी पावसाचा अतिरेक झाल्याने या भागात अगदी पावसाचा फटका पिकांना बसला. पाहिजे त्या प्रमाणात सोयाबीन, कपाशीचे पीक बहरले नाही ही वस्तुस्थिती आहे.

या वर्षी तालुक्यात कपाशीचा लागवड घटलेली आहे. शिवाय कपाशीवर विविध रोगांचे आक्रमण झाले. बरीच कपाशी लालसर झाल्याने उत्पादनात मोठी घट येणार असल्याची भीती शेतकरी व्यक्त करीत आहेत. सध्या कापसाचे बाजारभाव सहा ते साडेसहा हजार आहेत. प्रत्यक्ष लावगडीपासून ते उत्पादन तयार होईपर्यंत कपाशीचा मोठ्या प्रमाणात खर्च आहे.

रासायनिक खते, बी बियाणे, कीटकनाशक फवारणी, निंदण, वखरणी, डवरणी आदी खर्चासह वेचणी खर्च पाहता हे भाव शेतकऱ्यांना परवडेनासे आहेत. कमी उत्पादनामुळे भविष्यात कपाशीचे भाव वाढतील अशी शेतकऱ्यांना आशा आहे.

 सोयाबीन उत्पादक उद्ध्वस्त

सोयाबीन फुलोरावस्थेत असताना यावर्षी सतत झालेल्या पावसाने सोयाबीन पाहिजे त्या प्रमाणात भरले नाही. पर्यायाने सोयाबीनची उत्पादकता कमी राहील. काही निवडक वाणांना थोड्याफार शेतकऱ्यांना उत्पादन झाले. सोयाबीन पिकाचा वाढता खर्च आणि उत्पादन याचा कुठेच ताळमेळ बसत नाही. शिवाय सोयाबीनचे घसरलेले भाव यामुळे सोयाबीन उत्पादक शेतकरी उद्ध्वस्त झाला आहे.