Political Crisis : राज्यातील आजारी शासकीय आरोग्यव्यवस्था, कंत्राटी नोकर भरती, दुष्काळ परिस्थिती आणि आरक्षणाच्या मुद्द्यावरुन काॅंग्रेसच्या शिष्टमंडळाने आज राज्यपाल रमेश बैस यांची भेट घेतली. या महत्त्वाच्या विषयांवर चर्चा करण्यासाठी विधीमंडळाचे विशेष अधिवेशन बोलावण्याची मागणी केली.

नांदेड मृत्यूप्रकरणाच्या पार्श्वभूमीवर या शिष्टमंडळाने राज्यपालांची भेट घेतली महाराष्ट्र काँग्रेस कमिटीचे अध्यक्ष नाना पटोले यांच्या नेतृत्वाखाली विधानसभातील विरोधी पक्षनेते विजय वड्डेटीवार, माजी मंत्री चंद्रकांत हांडोरे, नसीम खान , मुंबई विभागीय काँग्रेस कमिटी अध्यक्षा वर्षा गायकवाड व काँग्रेस पक्षाचे सर्व आमदार, ज्येष्ठ नेते उपस्थित होते.

राज्यपालांची भेट घेतल्यानंतर या शिष्टमंडळातील नाना पटोले आणि विजय वड्डेटीवार यांनी प्रसारमाध्यमांना प्रतिक्रिया दिली. यावेळी त्यांनी आरोग्यमंत्री तानाजी सावंत यांच्या राजीनाम्याची मागणी केली.