Sindhudurg News : जिल्ह्यात झालेल्या अतिवृष्टीत ८८० हेक्टर शेती आणि बागायतीचे १ कोटी ३७ लाख ५० हजारांचे नुकसान झाले. या नुकसानीची भरपाई अजूनही शेतकऱ्यांच्या खात्यात जमा झालेली नसल्यामुळे ही भरपाई नेमकी कधी मिळणार, असा प्रश्न जिल्ह्यातील ७ हजार १२० शेतकऱ्यांमधून उपस्थित केला जात आहे.

जिलह्यात या वर्षी मे अखेरीला वादळीवाऱ्यासह जोरदार पाऊस झाला. या कालावधीत आंबा, काजूसह विविध फळपिकांचे नुकसान झाले. त्यानंतर जिल्ह्यात खरीप हंगामाला सुरुवात झाली. ६ जुलैपासून जिल्ह्यात अतिवृष्टी झाली. त्यामुळे पूरस्थिती निर्माण होऊन भातपीक, नाचणी, भुईमूग, मका, मोठे नुकसान झाले.

याशिवाय आंबा, काजू, नारळ, कोकम, फणस, केळी, सुपारी, अननस यांसह विविध फळपिकाचे नुकसान झाले. जिल्ह्यातील भात आणि इतर जिरायत पिकांचे सुमारे ६६७.३३ हेक्टर, तर फळपिकांचे सुमारे २११.५८ हेक्टरचे नुकसान झाले. जिल्ह्यातील ७ हजार १२० शेतकऱ्यांचे सुमारे १ कोटी ३७ लाख ५३ हजार रुपयांचे नुकसान झाले.

काही नुकसानीचे कृषी विभाग आणि महसूल विभागाने संयुक्त पंचनामे केले. परंतु काही क्षेत्रावरील नुकसानीचे अजूनही संयुक्त पंचनामे केलेले नाहीत. मे अखेरीला नुकसान झाल्यानंतर आता तीन महिन्यांचा कालावधी उलटला आहे. तरीदेखील अजूनही त्या शेतकऱ्यांना नुकसान भरपाई मिळालेली नाही.

याशिवाय जून, जुलैमधील शेतकऱ्यांना देखील नुकसान भरपाई मिळालेली नाही. त्यामुळे ही भरपाई मिळणार तरी कधी असा प्रश्न जिल्ह्यातील ७ हजार १२० शेतकऱ्यांमधून उपस्थित केला जात आहे.