Nanded News: जिल्हाधिकारी राहुल कर्डिले यांनी नुकतीच बिलोली तालुक्यातील बेळकोणी येथील अमृतालयम शेतकरी उत्पादक कंपनीला भेट देऊन कंपनीने उभे केलेले शाश्वत मॉडेल सविस्तर समजावून घेतले.

यात त्यांनी कंपनीकडून शेतकऱ्यांना मिळणारी सेवा, बिजोत्पादन कार्यक्रम, ड्रोन फवारणी, कृषी अवजारे बँक, वेअर हॉउसची पाहणी केली. यावेळी शेतकऱ्यांच्या समस्या जाणून घेतल्या. बेळकोणी येथील उच्चशिक्षित तरुण माधव तरकंटे यांनी पुण्यातील नोकरी सोडून शेतकऱ्यांविषयी शाश्‍वत मॉडेल उभे करण्यासाठी अमृतालयम शेतकरी उत्पादक कंपनीची स्थापना केली.

या कंपनीचे केलेले काम पाहण्यासाठी जिल्हाधिकारी राहुल कर्डिले यांनी नुकतीच भेट दिली. यावेळी त्यांनी शेतकऱ्यांशी संवाद साधला. अमृतालयम शेतकरी उत्पादक कंपनी अंतर्गत सुरू असलेल्या कृषी निविष्ठा केंद्र, सोयाबीन बिजोत्पादन, ड्रोन फवारणी प्रात्याक्षीक, कृषी अवजारे बँक, वेअर हॉऊसची पाहणी केली.

येत्या काळात अमृतालयम कंपनीसारखे शाश्वत मॉडेल आपल्या परिसरात आणि नांदेड जिल्ह्यात उभा करता येतील का यासाठी प्रशासन आणि शेतकरी मिळून प्रयत्न करूया अशा सूचना जिल्हाधिकारी राहुल कर्डिले यांनी दिल्या. अमृतालयम कंपनीची सुरुवात जाणून घेऊन त्यांनी सोयाबीन बिजोत्पादन वाढविण्याचे सुचविले, यासोबतच शेतकरी कंपनीच्या अडचणी समजावून घेतल्या.

वेअर हॉऊच्या माध्यमातून त्यांनी पणनकडून शासकीय खरेदी केंद्र सुरू करण्यासाठी जिल्हा पणन अधिकारी राजेश हेमके यांना सूचना केली. यावेळी बिलोली तालुका कृषी अधिकारी विवेक गुडूप यांच्यासह मंडळ कृषी अधिकारी आणि सहाय्यक कृषी अधिकारी उपस्थित होते.