Jalgaon News :  खानदेशात पावसाळी व ढगाळ वातावरण पुन्हा तयार झाले आहे. मध्यंतरी तब्बल ४० दिवस ढगाळ वातावरण होते. गेले सहा-सात दिवस बऱ्यापैकी थंडी होती. पण पुन्हा विषम वातावर तयार होत आहे.

नोव्हेंबरच्या सुरुवातीला व मध्यात काही दिवस निरभ्र वातावरण होते. परंतु नोव्हेंबरच्या मध्यापासून ते आतापर्यंत ढगाळ वातावरण आहे. स्वच्छ सूर्यप्रकाशित वातावरणच नाही. यामुळे पिकांचे नुकसान होण्याची भीती आहे. कापसाची खेडा खरेदीदेखील थंड होऊ शकते. निरभ्र, कोरड्या वातावरणाची पिकांना गरज आहे.

नोव्हेंबरमध्ये २१ तारखेनंतर खानदेशात अनेक भागांत पाऊस झाला. यानंतर ढगाळ व पावसाळी वातावरण कायम होते. २३ नोव्हेंबरला रात्रीदेखील अनेक भागांत मध्यम ते जोरदार पाऊस झाला. जळगावमध्ये चोपडा, धरणगाव, जळगाव, एरंडोल, पाचोरा आदी भागांत मध्यम पाऊस झाला. काही भागांत हलकी गारपीट झाली.

नंदुरबार, धुळ्यात मोठी हानी झाली. धुळ्यातही धुळे, शिरपूर भागांत हलका ते मध्यम पाऊस झाला. अतिवृष्टी नंदुरबारातील २५ महसूल मंडलांत झाली. पावसाने रब्बीतील पिकांची पेरणी, केळीची काढणी, शेतात पडून असलेल्या चाऱ्याची वाहतूक रखडली होती. ही कार्यवाही पाऊस थांबताच सुरू झाली, परंतु दोन दिवसांपासून पुन्हा ढगाळ वातावरण आहे.

अनेक दिवसांपासून थंडीची प्रतीक्षा आहे. रविवारी (ता. १०) काहीसे कोरडे वातावरण व थंडी होती. पण सोमवारी (ता. ११) रात्री ढगाळ वातावरण तयार झाले. यामुळे शेतकऱ्यांनी धसका घेतला आहे. थंडीअभावी रब्बी पिकांच्या वाढीवर परिणाम होऊ शकतो. सततच्या विषम वातावरणामुळे शेतकरी त्रस्त आहेत. सकाळपासून ढगाळ, पावसाळी वातावरण राहते.