Dharashiva News : यंदाचे पाऊसमान लक्षात घेता लवकर पक्व होणाऱ्या (कमी कालावधीच्या), कमी पाण्यात येणाऱ्या सुधारित वाणांची निवड करावी. तसेच रुंद सरी वरंबा व आंतरपीक पद्धतीचा अवलंब करण्याचे आवाहन कृषी विज्ञान केंद्राने केले आहे.

कृषी विज्ञान केंद्राच्या तज्ज्ञांच्या माहितीनुसार, या वर्षी ‘एल निनो’चा प्रादुर्भाव असल्याने जून महिन्यामध्ये पाऊस सरासरीपेक्षा कमी पडण्याचा अंदाज भारतीय हवामान विभागाने दिला आहे.

जून महिन्यातील कमी पर्जन्यमान व तापमानवाढ लक्षात घेता खरीप हंगामातील पेरणीचे नियोजन करावे. खरीप हंगाम जेमतेम १५ दिवसांवर आला. त्या अनुषंगाने शेतकऱ्यांचे पेरणीचे नियोजन सुरू आहे. परंतु त्यासाठी हवामानाचा अंदाज घेणे फार महत्त्वाचे आहे.

जूनमध्ये जिल्ह्यात सरासरीपेक्षा कमी पावसासोबतच तापमानाचा पारासुद्धा जास्त राहण्याचा अंदाज आहे. त्यामुळे शेतकरी बांधवांनी उपलब्ध पाण्याचे सुयोग्य नियोजन करणे गरजेचे आहे.

हवामान विभागाने नुकताच मॉन्सूनचा दीर्घ कालीन (जून ते सप्टेंबर) अंदाज जाहीर केला. त्यानुसार या वर्षी वार्षिक सरासरीच्या ९६ टक्के पावसाचा अंदाज आहे. त्यानुसार पेरणीचे योग्य नियोजन करणे गरजेचे आहे.