Gondia News : अरण्यऋषी पद्मश्री मारुती चितमल्ली यांनी बुधवारी (दि.१८) सोलापुरात अंतिम श्वास घेतला. त्यांच्या अंतिम संस्कारानंतर त्यांच्या इच्छेनुसार त्यांच्या अस्थी माधवझरी परिसरात विसावणार होत्या. मात्र याला वनविभागाची परवानगी न मिळाल्याने हा कार्यक्रम पुढे ढकलण्यात आला आहे.

गोंदिया जिल्ह्याच्या अर्जुनी मोरगाव तालुक्यातील पवनीधाबे येथील अरण्यपुत्र माधवराव पाटील डोंगरवार हे पद्मश्री चितमपल्ली यांचे गुरू. वन्यप्राण्यांना उन्हाळ्यात पाण्याची चणचण भासू नये म्हणून माधवरावांनी माधवझरी हा परिसर निर्माण केला. सदर स्थळ माधवझरी हे नवेगावबांध (प्रादेशिक ) वनक्षेत्रात येत असून चुटिया कॅम्प परिसरात आहे. तिथेच माधवराव यांचा अंत्यविधी पार पडला होता.

त्या ठिकाणीच त्यांची समाधी बांधली आहे. माझ्याही अस्थी त्यांच्या शेजारी पुरण्यात याव्यात, अशी इच्छा अरण्यऋषींनी व्यक्त केली होती. त्यानुसार चितमपल्ली कुटुंबीयांनी त्यांच्या अस्थी धाबेपवनी येथे पाठविण्याचा निर्णय घेतला. २१ जून रोजी माधवझरी येथे येणार होत्या. मात्र, वनविभागाची परवानगी नसल्याने शनिवारी होणारा अस्थिकलश दफनविधी तूर्तास स्थगित झाला आहे.

याबाबत नवेगावबांधचे  सहाय्यक उपवनसंरक्षक अविनाश मेश्राम तसेच वन्यजीव विभागाचे वनपरिक्षेत्र अधिकारी प्रतिभा रामटेके, बोंडे वनपरिक्षेत्राचे वनपरिक्षेत्राधिकारी सुनील मडावी यांना विचारले असता आपल्याला या संदर्भात माहिती नसल्याचे त्यांनी सांगितले