Walchandnagar News : भवानीनगर (ता. इंदापूर ) येथील श्री छत्रपती सहकारी साखर कारखान्याची पंचवार्षिक निवडणूक लोकसभेची निवडणूक झाल्यानंतर जूननंतर होणार आहे. त्यामुळे कारखान्याच्या विद्यमान संचालक मंडळाला चार वर्षांपेक्षा अधिक मुदतवाढीचा बोनस मिळणार आहे.

श्री छत्रपती सहकारी साखर कारखान्याची पंचवार्षिक निवडणूक एप्रिल २०१५ मध्ये झाली होती. संचालक मंडळाचा कार्यकाळ ११ मे २०२० पर्यंत होता. २०२० मध्ये छत्रपती कारखान्याची पंचवार्षिक निवडणूक होणे अपेक्षित होते.

आतापर्यंत निवडणुकीसाठी तीन वेळा मतदार यादी प्रसिद्ध करण्यात आली. मात्र कारखान्याचे माजी अध्यक्ष पृथ्वीराज जाचक (Prithviraj Jachak) यांच्यासह अनेक सभासदांनी कारखान्याला सलग ऊस पुरवठा न करणारे सभासद, थकबाकीदार सभासद यांच्यासह अक्रियाशील सभासदांना मतदानाचा अधिकार देऊ नये, यासाठी उच्च न्यायालयामध्ये याचिका दाखल केली.

त्यामुळे निवडणूक पुढे ढकलण्यात आली. कोरोना काळामध्ये राज्य सरकारने निवडणूक पुढे ढकलली. सध्या लोकसभेच्या निवडणुकीचे वारे वाहू लागले आहे.

राज्य सरकारने बुधवारी ( ता.२८ ) आदेश काढून सहकारी संस्थांच्या निवडणुका लोकसभा निवडणुकीच्या (Loksabha Election 2024) पार्श्वभूमीवर ३१ मे पर्यंत पुढे ढकलण्याचा निर्णय घेतला आहे. या निर्णयामुळे छत्रपती कारखान्याची निवडणूक मे नंतरच होणार आहे.