Solapur News : श्री संत ज्ञानेश्‍वर महाराज व श्री संत तुकाराम महाराज तसेच अन्य संताच्या पालख्याबरोबर आषाढी यात्रा सोहळ्यासाठी पंढरपूरात मोठ्या संख्येने वारकरी, भाविक येतात.

पालखी सोहळ्याबरोबर येणाऱ्या भाविकांना पालखी मार्गावर, तसेच पंढरपूर शहरात व परिसरात स्वच्छ व मुबलक प्रमाणात पाणी मिळावे, यासाठी पालखी मार्गावरील तसेच शहरातील पाणीपुवठा करणाऱ्या जलस्रोतांची तपासणी करावी, अशा सूचना प्रांताधिकारी गजानन गुरव यांनी दिल्या.

आषाढी यात्रा कालावधीत पालखी मार्ग तसेच शहरातील पाणीपुरवठा व्यवस्थापनाबाबत प्रांत कार्यालय, पंढरपूर येथे बैठकीचे आयोजन करण्यात आले होते. त्यात त्यांनी या सूचना दिल्या.

या बैठकीस उपविभागीय पोलीस अधिकारी अर्जुन भोसले, तहसीलदार सुशील बेल्हेकर, गटविकास अधिकारी प्रशांत काळे, मुख्याधिकारी अरविंद माळी, तालुका आरोग्य अधिकारी डॉ. एकनाथ बोधले, महावितरणचे कार्यकारी अभियंता बी. ए. भोळे उपस्थित होते.

श्री. गुरव म्हणाले, की पंढरपूर तालुक्यात पालखी मार्गावर ७१९ जलस्रोत व टँकर भरण्यासाठी १२ ठिकाणे निश्‍चित करण्यात आली आहेत. तसेच आषाढी यात्रा कालावधीसाठी मुबलक पाणीपुरवठा यासाठी पंढरपूर शहर व परिसरात ३६ बोअरवेल, ५० हातपंप, टॅकर भरण्यासाठी दोन ठिकाणे व ६५ एकर येथील पाणीपुरवठा व्यवस्था नगरपालिकेच्या वतीने करण्यात आली आहे.

या सर्व ठिकाणच्या जलस्रोतांची तपासणी करावी. तसेच ज्या ठिकाणचे पाणी पिण्यास अयोग्य अशा ठिकाणी ठळक माहिती फलक लावावेत. पालखी मार्गावरील टँकर भरण्याच्या ठिकाणी कोणताही अडथळा येणार नाही, याची दक्षता घ्यावी, असेही ते म्हणाले. पाटबंधारे विभागाने वारी कालावधीत नदीपात्रात पाणी सोडण्याबाबत नियोजन करावे, अशा सूचनाही प्रांताधिकारी श्री. गुरव यांनी या वेळी दिल्या.