Sindhudurg News: दर वर्षीच्या तुलनेत महिनाभर विलंबाने म्हणजे फेब्रुवारीच्या अखेरीस सुरू झालेला काजू हंगाम आटोपला आहे. मात्र त्यानंतर सुरू होणारा पालवी काजू हंगामाच्या आशा कडक उन्हामुळे मावळल्या आहेत. हंगामात उत्पादनाच्या दोन ते तीन टक्के पालवी काजू बी शेतकऱ्यांना मिळते.

लांबलेल्या पावसामुळे या वर्षी काजूच्या झाडांना ऑक्टोबर महिन्यात येणारी पालवी आणि मोहोर नोव्हेंबर ते डिसेंबर महिन्यात आली. त्यामुळे उत्पादनाला फेब्रुवारीच्या अखेरीस सुरुवात झाली. १५ मार्चपर्यंत अतिशय धीम्यागतीने उत्पादन सुरू झाले. त्यानंतर १५ मार्च ते २० एप्रिलपर्यंत अतिशय धीम्यागतीने हंगाम सुरू होता. गेले दहा-बारा दिवस पालापाचोळ्यात पडलेल्या काजू बी निवडण्याचे काम सुरू होते.

हे कामदेखील आता पूर्ण झाले आहे. त्यासोबतच या वर्षीचा काजू हंगाम आटोपला आहे. या वर्षी सुरुवातीपासूनच काजू बी ला चांगला दर होता. वेंगुर्ला येथे सात जातीच्या काजू बी ला १७० ते १८० रुपयांपर्यंत दर होता. तर सरसकट काजू बी ला प्रतिकिलो १६० ते १६५ पर्यंत दर होता. तो दर हंगाम संपेपर्यंत राहिला. या वर्षी काजू बी चे उत्पादन २५ ते ३० टक्के राहिले.

नियमित काजू हंगामानंतर पालवी काजू हंगाम सुरू होतो. एकूण उत्पादनाच्या २ ते ३ टक्के काजू बी शेतकऱ्यांना या हंगामातून मिळते. परंतु या वर्षी कडक उन्हाळ्यामुळे या हंगामाच्या आशा मावळल्या आहेत. दर वर्षी साधारणपणे मार्च अखेरीस हंगाम संपतो. त्यामुळे एप्रिलमध्ये हा हंगाम सुरू होतो. परंतु या वर्षी हंगाम लांबल्यामुळे पालवी काजू हंगामाच्या आशा मावळल्या आहेत.

जून, जुलैमध्ये काजू बी दरात सुधारणा होण्याचे संकेत

जिल्ह्यात या वर्षी नियमित काजू हंगाम सुरू झाल्यानंतर काजू बी ला प्रतिकिलो १६५ ते १८५ पर्यंत दर कायम टिकून राहिला. त्यामुळे या वर्षी जून, जुलैमध्ये काजू बी च्या दरात आणखी सुधारणा होण्याचे संकेत मिळत आहेत. गेल्या वर्षीच्या काजू हंगामात प्रतिकिलो १२० ते १४५ पर्यंत दर होते. मात्र गणेशोत्सव, दिवाळी कालावधीत काजू बी चे दर प्रतिकिलो २०० रुपयांपर्यंत गेले होते. त्यामुळे या वर्षी देखील त्यापेक्षा अधिक दर मिळेल, अशी शक्यता आहे.