Nashik News : शेतकऱ्यांची अर्थवाहिनी असलेल्या जिल्हा मध्यवर्ती सहकारी बँकेच्या कर्जवाटपात अनियमतता झाली असेल, तर दोषींवर कारवाई व्हायलाच हवी. त्यात माजी संचालक असतील किंवा अगदी मी दोषी आढळलो, तरी माझ्याविरोधातही गुन्हा दाखल करा, अशी परखड भूमिका मांडत कृषिमंत्री अॅड. माणिकराव कोकाटे यांनी जिल्हा बँकेच्या कर्जवसुलीचे समर्थन केले.

आर्थिक अडचणीत असलेल्या जिल्हा बँकेने कर्जवसुली मोहीम हाती घेतली आहे. याविषयी कृषिमंत्री अॅड. कोकाटे म्हणाले, की जिल्हा बँकेकडे पैसे नसल्याने ठेवीदारांना अनेक अडचणींचा सामना करावा लागतो. मात्र, शेतकरी कर्ज भरत नाहीत.

उलट ही कारवाई थांबविण्यासाठी काही शेतकरी मला भेटले. कारवाई थांबविणे अवघड असून, त्यातून काही तरी कायदेशीर मार्ग काढण्याचा प्रयत्न सुरू आहे. कर्जवाटपात दोषी संचालकांवर कारवाई झालीच पाहिजे. अगदी मी दोषी असेन तर माझ्यावर कारवाई करा, असे कोकाटे म्हणाले.

कर्जमाफीचा विषय माझा नाही

शेतकऱ्यांना कर्जमाफी देण्याचा विषय माझ्या आखत्यारित येत नसून, त्याविषयी मुख्यमंत्री व उपमुख्यमंत्री निर्णय घेतील. शेतकरी कर्जमाफीत दोन गट आहेत. त्यातील एक गट सातत्याने कर्ज भरतो. मग आमच्यावर अन्याय का, अशी त्यांची भावना आहे; तर दुसरा गट थकबाकीदारांचा आहे. आत्महत्येची वेळ आली, कर्जमाफ करा, असे त्यांचे म्हणणे असते. याविषयी सरकार योग्य निर्णय घेईल.