Buldana News : जिल्ह्यात अवैध वाळू उत्खनन व वाहतूक करणाऱ्यांवर एमपीडीए अर्थात महाराष्ट्र धोकादायक व्यक्ती प्रतिबंधक कायद्याअंतर्गत गुन्हे दाखल करा, असे स्पष्ट निर्देश महसूलमंत्री चंद्रशेखर बावनकुळे यांनी जिल्हाधिकारी आणि पोलिस अधीक्षकांना दिले.

येथे शनिवारी (ता. ९) महसूल विभागाच्या आढावा बैठकीत मंत्री बावनकुळे बोलत होते. महसूल, मुद्रांक शुल्क व नोंदणी, भूमी अभिलेख विभागांचा आढावा या वेळी त्यानी घेतला. या बैठकीला कामगारमंत्री ॲड. आकाश फुंडकर, आमदार श्‍वेता महाले, आमदार संजय गायकवाड, आमदार मनोज कायंदे, जिल्हाधिकारी डॉ. किरण पाटील, पोलीस अधीक्षक नीलेश तांबे, उपवनसंरक्षक सरोज गवस, सर्व उपविभागीय अधिकारी, तहसीलदार उपस्थित होते.

‘जिल्ह्यात अवैध गौण खनिज उत्खनन व वाहतूक करणारे आणि त्यात सामील असणाऱ्या महसूल अधिकारी व कर्मचाऱ्यांवर निगराणी ठेवून दोषींवर कारवाई करावी. अवैध गौण खनिज उत्खनन व वाहतूक करणाऱ्यावर कारवाई करताना मंत्री, खासदार, आमदारांच्या सूचना आल्यास त्यानुसार कार्यवाही करू नका आणि वाळू माफियांना सोडू नका,’ असे निर्देश श्री. बावनकुळे यांनी प्रशासनाला दिले. ‘जिल्ह्यात यापुढे अवैध वाळू उत्खनन व वाहतुकीला जिल्हाधिकारी, पोलिस अधीक्षकांवर जबाबदारी निश्‍चित केली जाईल,’ असा इशाराही त्यांनी या वेळी दिला.

ते म्हणाले, की जिल्ह्यातील वाळू साठे आणि वाळू घाटांचे पुन्हा सर्व्हेक्षण करावे. त्यासाठी उपविभागीय अधिकारी, तहसीलदारांनी पाहणी करावी व एमआरसॅक यंत्रणेचा वापर करावा. तसेच नवीन वाळू धोरणानुसार कार्यवाही करावी. यासह, कृत्रिम वाळू धोरणाअंतर्गत वाळूचा उच्च दर्जा असावा, याची खबरदारी घ्यावी.

घरकुलांसाठी गरीब, सर्वसामान्यांना वाळू उपलब्ध करून द्यावी. अवैध वाळू वाहतूकदारांकडील प्रलंबित दंड वसूल करावे. गायरान जमिनीवरील घरांची प्रकरणे निकाली काढावीत, त्यासाठी व्यापक मोहीम राबवावी. शासकीय जमिनी बेकायदा बळकावणाऱ्या धनदांडग्यांवर कारवाई करावी. पाणंद व शिवररस्ते मोकळे करावेत. त्यानुषंगाने गावनिहाय नकाशे तयार करून दर्शनी भागात लावावेत.

ते म्हणाले, की प्रशासनाने शेतकऱ्यांच्या घरोघरी भेटी द्याव्यात. पोटखराब, कजाप, सात-बारा दुरुस्तीची कामे लवकरात लवकर पूर्ण करावीत. शासनाच्या धोरणानुसार डिसेंबरपर्यंत भोगवटादार वर्ग २ च्या जमिनी भोगवटादार वर्ग १ मध्ये रूपांतरित कराव्यात. याबाबत प्रस्ताव सादर करण्याचे शेतकऱ्यांना आवाहन करावे.

ई-चावडी, जिवंत सात-बारा मोहिमेचे कौतुक

जिल्हा महसूल प्रशासनामार्फत राबविण्यात येणाऱ्या ई-चावडी, जिवंत सात-बारा मोहिमेची अंमलबजावणी समाधानकारक असून या मोहिमेचा टप्पा दोन लवकर पूर्ण करा, असे निर्देश देऊन श्री. बावनकुळे यांनी या मोहिमेचे कौतुक केले.