Chakan News: चाकण जवळील खराबवाडी (ता. खेड) येथे साडेचार एकर उभे ज्वारीचे पीक पाखरांच्या चाऱ्यासाठी सोडले आहे, असे शेतकरी प्रवीण शहा यांनी सांगितले. मुबलक चारा पक्ष्यांना मिळावा, यासाठी प्रवीण शहा गेली सतरा वर्षे हा उपक्रम राबवतात. त्यांच्या उपक्रमामुळे पाखरे हक्काने त्यांच्या शेतात येतात.

त्यामुळे दरवर्षी हिवाळ्याच्या दिवसांत हक्काचे शेत म्हणून या शेतात पक्षी येतात. सध्या कडब्याच्या चाऱ्यालाही मोठी मागणी आहे.

रानात, शिवारात फिरणाऱ्या पाखरांसाठी काही शेतकरी गोफणीने, बिलवरीने दगड मारून पाखरांना हकलतात. त्यामुळे पाखरांच्या चाऱ्याची मोठी गैरसोय होते. त्यामुळे चाऱ्यासाठी पाखरांना रानोरान वणवण करावी लागते.

याबाबत शेतकरी प्रवीण शहा यांनी सांगितले, की चाकण परिसरात मोठी औद्योगिक वसाहत झाल्याने जमिनीचे क्षेत्र घटले आहे.

त्यामुळे पक्ष्यांच्या चाऱ्याचा प्रश्न उभा ठाकला आहे. पक्ष्यांना हक्काचा चारा मिळत नसल्याने पाखरे दुर्मीळ होत आहेत. त्यांना हक्काचा चारा मिळावा, यासाठी गेली सतरा वर्षे हा उपक्रम राबवतोय. त्यामुळे मला समाधान वाटते आहे.