Jalgaon News : जिल्ह्यात जळगाव, पाचोरा, भडगाव, एरंडोल, जामनेर तालुक्यांना उन्हाळ्यात अनेकदा तुफान वादळी-वाऱ्यासह पावसाने चांगलेच झोडपून काढले. या अवकाळी पावसामुळे शेतामधील उभी केळी तर आडवी झालीच शिवाय लिंबासह मका, ज्वारी, गहू आदी उन्हाळी पिकांचे मोठे नुकसान झाले होते.

नुकसानीचे पंचनामे झाले, परंतु भरपाई केव्हा मिळेल, असा सवाल शेतकरी उपस्थित करीत आहेत. काहींच्या घरांवरील पत्रे उडून गेल्याने घरातील जीवनावश्यक वस्तूंसह अन्य सामानही भिजले होते. जामनेर तालुक्यातील खडकी-बोरगाव, महुखेडा, लोणी, गोरनाळे, आमखेडा, सावरला, तळेगाव आदी गावांना या अचानक आलेल्या अवकाळी पावसामुळे मोठ्या प्रमाणात फटका बसला होता.

जळगाव, पाचोरा, एरंडोल आदी भागांतही अनेक गावांत नुकसान झाले. एरंडोलातील उत्राण गावास मोठा फटका वादळी पावसात मे व जूनमध्ये बसला होता. ८ ते ११ एप्रिल या कालावधीत मोठा वादळी पाऊस जामनेर भागात झाला होता. जामनेर शहरालाही पावसाने झोडपले होते.

पावसाने झालेल्या नुकसानीचे पंचनामे तातडीने पूर्ण करण्याचे आदेश होते. यानंतर पंचनामे झाले. या झालेल्या नुकसानीची राज्य शासनाने दखल घेतली. पण नुकसानग्रस्त शेतकरी, पीडितांना आवश्यक सर्व ती मदत मिळालेली नाही, असे शेतकऱ्यांचे म्हणणे आहे.

अमळनेरमध्येही नुकसान

अमळनेर, यावल या भागांतही एप्रिल ते मे या कालावधीत गारपीट, वादळी पाऊस झाला होता. सलग तीन-चार दिवस पाऊस, वादळ झाले. यात पिकांची मोठी हानी झाली आहे. पंचनामेही तीन दिवस सुरूच होते. पंचनामे पूर्ण करून अहवाल प्रशासनाने सादर केला आहे. नुकसानग्रस्तांना भरीव मदत मिळावी, अशी मागणी करण्यात आली आहे.