Amravati News : बांगलादेशने संत्र्यावरील आयात शुल्कात वाढ केल्याने देशांतर्गत संत्र्याचे दर दबावात आले आहेत. परिणामी या प्रकरणात केंद्र सरकारच्या वाणिज्य मंत्रालयाने त्वरित हस्तक्षेप करावा, त्यासाठी राज्याने पाठपुरावा करण्याची मागणी आमदार बच्चू कडू यांनी मुंबई येथे सोमवारी (ता. १६) मुख्यमंत्री एकनाथ पवार यांच्याकडे केली. मुख्यमंत्र्यांनी याला सकारात्मक प्रतिसाद देत वाणिज्य मंत्रालयाशी पत्रव्यवहार केला आहे. आता या प्रकरणी केंद्र काय भूमिका घेते याकडे सर्वांचे लक्ष्य लागले आहे.

राज्यात सुमारे दीड लाख हेक्‍टरवर तर विदर्भातील अमरावती जिल्ह्यात १ लाख हेक्‍टरवर संत्रा लागवड आहे. त्यामुळेच संत्रा हे विदर्भाचे मुख्य फळपीक ठरले आहे. राज्याची एकूण उत्पादकता पाच लाख टन आहे. टेबलफ्रूट म्हणून मान्यता असलेल्या नागपुरी संत्र्यावर अपेक्षित संशोधन झाले नाही. परिणामी याची टिकवण क्षमता कमी असल्याने निर्यातीला मर्यादा आहेत. बांगलादेश हा नागपुरी संत्र्याचा सर्वातमोठा आयातदार देश आहे. मात्र बांगलादेशने भारतीय आयात-निर्यात सातत्याने होणाऱ्या बदलाच्या धोरणाला जशास तसे उत्तर देत आयात शुल्कात प्रति किलो ८८ इतकी वाढ केली. त्यामुळे बांगलादेशची निर्यात ठप्प झाल्याने देशाअंतर्गत बाजारात दर दबावात आले आहेत. विशेष म्हणजे यंदा उत्पादकता कमी असतानाही हे घडले. संत्रा उत्पादकांना अवघा १५ ते २५ रुपये किलोचा दर मिळत आहे.

संत्रा उत्पादक मेटाकुटीस आल्याने याची गंभीर दखल घेत आमदार कडू यांनी मुख्यमंत्र्यांची भेट घेतली. केंद्र सरकारच्या वाणिज्य मंत्रालयाने मुत्सद्देगिरीचा वापर करीत याप्रकरणात तोडगा काढावा, त्यासाठी राज्य सरकारने पाठपुरावा करावा, असे कडू यांनी मुख्यमंत्र्यांना सांगितले. बांगलादेशमधून भारतात आयात होणाऱ्या सर्व वस्तूंवर आयात शुल्क वाढवावे, अशी मागणी कडू यांच्याकडून करण्यात आली आहे.