Akola News: निवडणुकीत कर्जमाफीबाबत दिलेल्या आश्वासनांची पूर्तता करण्याची आठवण म्हणून शुक्रवारी (ता. २१) मूर्तिजापूर तालुक्यातील प्रगती शेतकरी मंडळ, स्वाभिमानी शेतकरी संघटना, न्यू यंग क्लब फार्मर्स ग्रुप, यंग बॉइज क्लब मूर्तिजापूर, जनमंच, आंतरभारती यांच्या पुढाकाराने ‘आठवण मोर्चा’ काढला जाणार आहे. या बाबत प्रशासनाला यापूर्वीच इशारा देण्यात आला आहे.

या मोर्चामध्ये शेतकरी बैलगाडी, ट्रॅक्टर आदी वाहने घेऊन सहभागी होणार आहेत. त्याचदिवशी प्रत्येक कर्जदार शेतकरी आपले वैयक्तिक निवेदन व आपल्याकडे असलेल्या बँकेच्या कर्जाच्या रक्कमेचा अर्ज भरून मुख्यमंत्र्यांना पाठवणार आहेत. वचन पूर्तीसाठी यापूर्वी दोन निवेदन देऊन या बाबत शासनाला अवगत केलेले आहे.

येत्या ३ मार्च रोजी सादर होणाऱ्या अर्थसंकल्पात कर्जमाफीच्या निधीची तरतूद करावी व कर्जमाफीची घोषणा करून ३१ मार्चपूर्वी शेतकऱ्यांचा सातबारा कोरा करून नवीन कर्ज वाटप होण्यास पात्र करावे, नियमित कर्ज भरणाऱ्या शेतकऱ्यांना एक लाख रुपये प्रोत्साहन निधी द्यावा, या वर्षीचा सोयाबीन पीकविमा त्वरित घोषित करून जून महिन्यापूर्वी शेतकऱ्यांच्या खात्यात जमा करावा, शेती साहित्यावरील जीएसटी रद्द करावा, शेतकुंपणासाठी १५ वर्षे कर्जफेडीचे धोरण आखण्यास रिझर्व्ह बँक व केंद्र शासनाकडे पाठपुरावा करावा, वयोवृद्ध शेतकरी, शेतमजुरांना १० हजार मासिक पेन्शन सुरू करावे, आदी मागण्यांसाठी मोर्चा काढला जाणार आहे.

...तर शेतकरी बसतील उपोषणाला

अर्थसंकल्पात कर्जमाफीच्या निधीची तरतूद केली नाही तर तालुक्यातील १५० गावांतील शेतकरी बेमुदत उपोषणाला बसतील, असा इशारा प्रगती शेतकरी मंडळाचे अध्यक्ष राजू वानखडे, ‘स्वाभिमानी’चे अध्यक्ष कैलास साबळे, जनमंचचे प्रा. सुधाकर गौरखेडे, आंतर भारतीचे प्रमोद राजनदेकर, सेवकराम लहाने, श्रीकृष्ण गुल्हाने, जगदीश जोगळे, मधुकर उघडे, प्रकाशसिंग राजपूत, अनिकेत खोत, प्रफुल्ल मालधुरे, संतोष रुद्रकार, हरनामसिंग बाजोरे, हरिभाऊ वानखडे, अनिल राठोड आणि अरुण बोंडे यांच्या स्वाक्षऱ्या आहेत.