Mumbai News : विधिमंडळ अधिवेशनात विरोधी पक्षाने तर कधी सत्तारूढ पक्षाने केलेल्या गोंधळाने सभागृह बंद करण्याची परंपरा आहे. मात्र आज विधानसभेतील अत्याधुनिक ध्वनिक्षेपक यंत्रणाच खराब झाल्याने अर्धा तास कामकाज बंद करावे लागण्याची नामुष्की अध्यक्षांवर ओढवली. ‘माईक वारंवार का बिघडतो याची एसआयटी’ चौकशी लावण्याची मागणी काँग्रेसचे आमदार नाना पटोले यांनी केली.

गेल्या पाच वर्षांपासून राज्याच्या मुंबईतील विधानमंडळात दुरुस्ती आणि नूतनीकरणाचे काम सुरूच आहे, अध्यक्ष बदलले तरी ते वेगवेगळ्या मार्गातून सुरूच राहिले आहे. नवीन अध्यक्षांच्या काळात विधानसभा सभागृहाची ध्वनी यंत्रणा बदलून टाकण्यात आली आहे. आधीची उत्तम दर्जाची बॉश कंपनीची यंत्रणा बदलून त्या जागी ब्राहलर या अन्य कंपनीची यंत्रणा लावण्यात आली आहे.

ही यंत्रणा बदलून टाकण्यात आल्यानंतर ती कायमच गाजत राहिली आहे, अनेकवेळा त्यात दोष आढळले आहेत, अनेकवेळा त्यातून चित्रविचित्र आवाज ऐकू येतात, बऱ्याचवेळा माईक सुरूच होत नाही. खरखर येते. मंगळवारी अर्थसंकल्प सादर करताना उपमुख्यमंत्री अजित पवार यांचा माईकच बंद पडल्याने गोंधळ झाला होता. अजित पवार यांच्या भाषणाचा सुरुवातीला स्पष्ट आवाजच येत नसल्याची सदस्यांनी ओरड केली.

बंद माईकवरून टोलेबाजी

बुधवारी (ता. २८) काँग्रेसचे आमदार पटोले बोलायला उभे राहिल्यावर माईक मधून किरकिर आवाज यायला लागला. अखेरीस नाना पटोले यांनी मीच बोलायला लागल्यावर माईकमधून आवाज का येतो? याची एसआयटी लावून चौकशी करा, असा चिमटा समोरच्या बाकावर बसलेले उपमुख्यमंत्री देवेंद्र फडणवीस यांना काढला. त्यावर समोर बसलेल्या फडणवीस यांनी तुमच्या माईकमध्ये व्हायरस घुसल्याने असे झाल्याचा टोला लगावला.

त्यावर ‘तो व्हायरस तुम्हीच घुसवला आहे, म्हणूनच एसआयटी चौकशी करा’ अशी मागणी केल्याचे उत्तर पटोले यांनी दिले. या दोघांच्या जुगलबंदीमध्ये विधानसभा अध्यक्ष ॲड. राहुल नार्वेकर देखील सहभागी होत, ‘व्हायरस घुसवण्याचे कटकारस्थान कोणी रचलंय त्याचा शोध घेण्याची आवश्यकता आहे’ असल्याचे सांगत गुगली टाकली. अखेरीस वारंवार ध्वनी यंत्रणा सतत त्रास देतच राहिल्याने अखेर सभागृहाचे कामकाज २५ मिनिटांसाठी तहकूब केले, त्यानंतर पुन्हा यंत्रणा तपासून काम सुरू करण्यात आले.