Buldana News : बुलडाणा जिल्ह्यातील सहकार क्षेत्राचे लक्ष लागलेल्या चिखली बाजार समितीच्या निवडणूक (Chikhli Market Committee Election) प्रक्रियेसाठी दाखल केलेल्या अर्जांपैकी तब्बल १९ अर्ज रद्द झाले आहेत. यात ११ माजी संचालकांच्या अर्जांचा समावेश असल्याने खळबळ उडाली आहे.

सत्तेत असताना बाजार समितीच्या निधीचा दुरुपयोग केल्याने कैलास शर्मा यांनी आक्षेप घेत अर्ज बाद करण्याची मागणी केली होती.

चिखली कृषी उत्पन्न बाजार समितीच्या निवडणुकीसाठी उमेदवारांनी दाखल केलेल्या अर्जांची बुधवारी (ता.पाच) छाननी करण्यात आली होती. यात यात १९ उमेदवारी अर्ज नामंजूर करण्यात आले.

२०१७ मध्ये कृषी उत्पन्न बाजार समितीच्या तत्कालीन संचालकांविरुद्ध शर्मा यांनी जिल्हा उपनिबंधकांकडे १९ मुद्द्यांच्या आधारे तक्रार केली होती. बाजार समितीत आर्थिक अनियमितता झाल्याचे त्यांचे म्हणणे होते.

या तक्रारीच्या अनुषंगाने जिल्हा उपनिबंधकांनी जळगाव जामोदचे सहाय्यक निबंधक आर. टी. अंभोरे आणि लेखापरीक्षक नांद्रे यांची दोन सदस्यीय चौकशी समिती नियुक्त केली होती. या समितीला चौकशी करण्याचे आदेश देण्यात आले होते.

या प्रकरणात केवळ चौकशी झालेली आहे. आरोप सिद्ध झालेला नाही. त्यामुळे अर्ज नामंजूर करण्याला वरिष्ठांकडे दाद मागितली जाणार असल्याचे बोलले जात आहे.

अर्ज नामंजूर झालेले उमेदवार हे काँग्रेस, राष्ट्रवादीशी निगडित आहेत. त्यातही काँग्रेसला सर्वाधिक फटका बसल्याचे बोलले जाते. याचा भाजप-शिवसेना (शिंदे) युतीला फायदा होण्याची शक्यता वाढली आहे.

यांचे अर्ज झाले नामंजूर

डॉ. सत्येंद्र कृष्णराव भुसारी (सहकारी संस्था), गजानन तुळशीराम पवार (हमाल मापारी), विजय दिनकरराव शेजोळ (सहकारी संस्था), रूपराव तुकाराम सावळे (सहकारी संस्था), गजानन शंकर मोरे (सहकारी संस्था व ग्रामपंचायत), ईश्वरराव भीमराव इंगळे (सहकारी संस्था), संजय माणिकराव गाडेकर (सहकारी संस्था), मनोज पांडुरंगखेडेकर व्यापारी अडतव सहकारी संस्था, सुमनबाई मधुकर म्हस्के सहकारी संस्था, विष्णू पुरुषोत्तम कुळसुंदर (सहकारी संस्था), काशिनाथ विश्वंभर अप्पा बोंद्रे (व्यापारी अडते) या प्रमुख उमेदवारांचे अर्ज नामंजूर करण्यात आले आहेत.