Pune News : राज्यातील शेतकऱ्यांना फवारणी पंपांचे वितरण करण्यासाठी ‘महाडीबीटी’वर अर्ज मागविण्याचा निर्णय कृषी आयुक्तालयाने घेतला आहे. राज्य पुरस्कृत एकात्मिक कापूस, सोयाबीन, इतर तेलबिया उत्पादकता वाढ व मूल्यसाखळी विकास योजना गेल्या काही महिन्यांपासून वादात सापडली आहे.

या योजनेतून फवारणी पंपांचा पुरवठा करण्यासाठी राबविलेल्या संशयास्पद निविदांच्या विरोधात राज्य शासनाकडे गंभीर स्वरूपाच्या तक्रारी गेलेल्या आहेत. त्यामुळे फवारणी पंपांचा पुरवठा तूर्त होणार नाही, असे सांगितले जात होते. मात्र आता पंप वितरणासाठी महाडीबीटी पोर्टलवर अर्ज मागविण्यात आल्यामुळे ठेकेदारांकडून पंपांचा पुरवठा होणार असल्याचे स्पष्ट झाले आहे.

शेतकऱ्यांना या संकेतस्थळाचा वापर ऑनलाइन अर्ज दाखल करण्यासाठी करता येईल. या योजनेबाबत माहिती हवी असल्यास जिल्हा अधीक्षक कृषी अधिकारी, उप विभागीय कृषी अधिकारी किंवा तालुका कृषी अधिकारी कार्यालयाशी संपर्क साधावा, असे आवाहन कृषी आयुक्तालयाने केले आहे.

१४ ऑगस्टपर्यंत मुदतवाढ

कृषी आयुक्तालयाच्या म्हणण्यानुसार, ही योजना राबविल्यामुळे कापूस, सोयाबीन व इतर तेलबिया आधारित पीक पद्धतीस चालना मिळेल. २०२२ ते २०२५ कालावधीत तीन टप्प्यात योजना राबविली जाईल. चालू २०२४-२५ आर्थिक वर्षासाठी बॅटरीचलित फवारणी पंपासाठी लाभार्थी निवड होईल. त्यासाठी महाडीबीटी पोर्टलवरी अर्जांतून ऑनलाइन पद्धतीने निवड होईल. अर्जांसाठी १४ ऑगस्टपर्यंत मुदतवाढ दिली आहे.