Solapur News : उजनी धरणामुळे दुष्काळी रब्बीचा जिल्हा म्हणून ओळख असलेल्या सोलापुरात आता खरीपाचे क्षेत्र विशेषत: ऊस व फळबागांचे क्षेत्र वाढले आहे. उजनीचे पाणी सद्य:स्थितीत दीड लाख हेक्टरला मिळत असून आता देगाव, एकरूख, शिरापूर, बार्शी, आष्टी, सांगोला, मंगळवेढा या महत्त्वाच्या उपसा सिंचन योजनांची कामे पूर्ण झाल्यानंतर जिल्ह्यातील आणखी एक लाख दहा हजार ७४६ हेक्टरला उजनीतून पाणी मिळणार आहे.

उजनी धरणाचे दरवाजे पहिल्यांदा जून १९८० मध्ये उघडले, पण ४४ वर्षानंतरही जिल्ह्यातील अनेक तालुक्यातील शेतकऱ्यांना पाणी मिळालेले नाही. त्यामुळे ठराविक तालुक्यात बागायती क्षेत्र वाढले, रोजगार निर्मितीतून विकासही झाला, पण दक्षिण सोलापूर, अक्कलकोट, उत्तर सोलापूर, मोहोळ, सांगोला, मंगळवेढ्याचा काही भाग, बार्शीचा काही भाग अद्याप विकासापासून दूरच आहे. या तालुक्यांमध्ये कोरडवाहू जमिनी जास्त आहेत. आता जिल्ह्याच्या सर्वांगिण विकासासाठी राज्य शासनाच्या माध्यमातून सात उपसा योजनांची कामे अंतिम टप्प्यात आहेत.

सांगोला व मंगळवेढा तालुक्यातील ३० हजार २०० हेक्टर जमिनीला आता उपसा सिंचन योजनांच्या माध्यमातून उजनीचे पाणी मिळेल. त्यातील सांगोल्याच्या योजनेचे तीन टप्पे असून ४० किमी कॅनॉलमधून शेतकऱ्यांना पाणी दिले जाईल. त्यासाठी अंदाजे ४०० कोटींचा खर्च अपेक्षित आहे.

तीन योजना अंतिम टप्प्यात, तर...

एकरूख, शिरापूर व आष्टी या तीन उपसा सिंचन योजनांवरील मुख्य कॅनॉलची कामे पूर्ण झाली असून आता पाणी वितरण व्यवस्थेसाठी छोट्या लाईनची कामे सुरू आहेत. तिन्ही योजनांचे १०० टक्के काम जून २०२५पर्यंत पूर्ण होणार आहे. बार्शी उपसा सिंचन योजनेसाठी दोन वर्षे लागतील. तर २८ किमी देगाव जलसेतूचे काम अंतिम टप्प्यात असून त्यामुळे चार हजार हेक्टर ओलिताखाली येणार आहे.

पुढे होटगी तलाव परिसरात पाणी लिफ्टिंग करून त्याठिकाणी पंप हाऊस उभारले जाणार आहे. पुढे टाकी बांधून तेथून दोन लाईन टाकून गॅव्हेटीने पाणी खाली वितरीत केले जाणार आहे. त्यासाठी अंदाजे दोन वर्षे लागणार असून त्यानंतर अक्कलकोट व दक्षिण सोलापुरातील आणखी १८ हजार हेक्टरला पाणी मिळणार आहे.