Pune News : मी महाराष्ट्राच्या विकास आणि कल्याणाची सांगड घालतो, यासाठी भीमाशंकराने मला ताकद द्यावी, आणि बळीराजाला सुखी करावे, असे साकडे मी भीमाशंकराला घातल्याचे मुख्यमंत्री एकनाथ शिंदे यांनी सोमवारी (ता.२) पत्रकारांशी बोलताना सांगितले.

मुख्यमंत्री एकनाथ शिंदे यांनी शेवटच्या श्रावणी सोमवारी श्री क्षेत्र भीमाशंकराचे दर्शन घेत अभिषेक केला. या वेळी खासदार डॉ. श्रीकांत शिंदे, पुणे म्हाडाचे अध्यक्ष शिवाजीराव आढळराव पाटील, शरद सोनवणे उपस्थित होते.

भीमाशंकर देवस्थान ट्रस्टच्या वतीने मुख्यमंत्री शिंदे यांचे स्वागत केले. मुख्यमंत्री शिंदे म्हणाले, की राज्यात सध्या सर्वदूर पाऊस पडत आहे.

या पावसाने अन्नधान्याचे चांगले उत्पादन होऊन, बळीराजा सुखी व्हावा, असे साकडे मी भीमाशंकरला घातले. मी विकास आणि कल्याणकारी राज्याची सांगड घालतो. यासाठी विविध लोककल्याणकारी योजना राबवीत आहे.