Solapur News : मोहोळ तालुक्यातील हराळवाडी येथील ग्रामस्थ, शेतकरी हे या परिसरातील साखर कारखान्याच्या केमिकलयुक्त पाण्याने हैराण झाले आहेत. ग्रामस्थांच्या आरोग्याला धोका निर्माण झाला आहे, शिवाय शेतीही धोक्यात आली आहे. याबाबत ग्रामस्थांनी लोकायुक्त, पर्यावरण मंत्री आणि न्यायालयाकडे तक्रारीचे निवेदन दिले आहे.

रात्री-अपरात्री हराळवाडी, कोरवली, जामगाव, कामती बुद्रूक या भागांत साखर कारखान्यातील रसायन मिश्रित केमिकल युक्त घाण पाणी सोडले जात आहे. ज्या शेतात रात्री कुणी नाही, अशा ठिकाणी साखर कारखान्याद्वारे टँकरद्वारे केमिकल पाणी आणून रस्त्याकडेला शेतामध्ये सोडून टँकरधारक पळ काढतात.

त्यामुळे शेतीचे मोठे नुकसान होत आहे. या पाण्याचा पाझर परिसरातील विहीर, बोर आणि कॅनॉलवर परिणाम होत आहे. त्यामुळे शेतीबरोबरच जनावरांसह माणसांचे आरोग्य धोक्यात आले आहे. त्यामुळे तत्काळ शासनाने केमिकलयुक्त पाणी सोडणाऱ्या साखर कारखान्यावर कारवाई करावी, अशी मागणी ग्रामस्थांमधून होत आहे. अन्यथा आंदोलन करू, असा इशाराही त्यांनी दिला आहे.