Latur Farmers : ऐन खरीप हंगामाच्या तोंडावर विविध मागण्यांसाठी कृषी सहायकांनी काम बंद आंदोलन हाती घेतले असून या आंदोलना दरम्यान लातूर कृषी विभागातील पाच जिल्ह्यातील कृषी सहायकांनी बुधवारी (ता. २१) येथील कृषी सहसंचालक कार्यालयासमोर धरणे आंदोलन केले.

कृषी सहायक कालावधी रद्द करुन कृषी सहायकांना नियमित नियुक्ती देण्यात यावी, पदनाम बदलून सहायक कृषी अधिकारी करावे, डिजिटल कामासाठी लॅपटॉप द्यावा, गाव पातळीवर कामासाठी मदतनीस द्यावा, निविष्ठा वाटपासाठी वाहतूक भाडे द्यावे, आकृतिबंधाला तातडीने मंजुरी देऊन त्यात कृषी पर्यवेक्षकांच्या पदात वाढ करुन कृषी सहायकांनी पदोन्नती द्यावी, आदींसह विविध मागण्यांसाठी कृषी सहायकांनी काही दिवसापासून टप्प्याटप्प्याने आंदोलन हाती घेतले आहे.

काळ्या फिती लावून काम करणे, सर्व शासकीय वॉटसप ग्रुपमधून बाहेर पडणे, एक दिवस सामुहिक रजेसह तालुका व जिल्हा पातळीवरील धरणे आंदोलानंतर कृषी सहायकांनी नऊ मेपासून ऑनलाइन कामकाजावर बहिष्कार टाकला. त्यानंतर १५ मेपासून बेमुदत काम बंद आंदोलन सुरु केले आहे. बुधवारी विभागीय कृषी सहसंचालक कार्यालयासमोर बुधवारी सकाळपासून धरणे आंदोलन सुरु केले आहे.

आंदोलनातूनच कृषी सहायक संघटनांच्या वतीने जिल्हा व विभागीय कृषी अधिकाऱ्यांकडे मागण्यांचे निवेदन सादर केले आहे. कृषी पर्यवेक्षक तसेच मंडळ कृषी अधिकाऱ्यांच्या संघटनांनीही या आंदोलनाला पाठिंबा दिल्याचे जिल्हाध्यक्ष ओंकार माने यांनी सांगितले. दरम्यान बुधवारी आयोजित खरीप हंगाम आढावा बैठकीत कृषी सहायकांच्या मागण्यांबाबत निर्णय होईल, अशी आशा असल्याचेही त्यांनी सांगितले. मागण्या मान्य होईपर्यंत आंदोलन सुरुच ठेवण्याचा इशारा त्यांनी दिला.

दरम्यान आंदोलनामुळे ऐन खरीपाच्या तोंडावर शेतकऱ्यांची अडचण झाली आहे. विविध योजनांच्या लाभासह शेतकऱ्यांना बीज प्रक्रिया व अन्य मार्गदर्शनासाठी कृषी सहायक उपलब्ध होत नसल्याची स्थिती आहे. बुधवारच्या कृषी सहसंचालक कार्यालयासमोरील आंदोलनात कृषी सहायक संघटनेचे नांदेडचे जिल्हाध्यक्ष शंकर पवार व सचिव दिलीप काकडे, लातूरचे ओंकार माने, शरद धनेगावे, हिंगोलीचे संतोष वाघमारे व श्रीनिवास शिंदे, परभणीचे संदीप शेळके व बबन राठोड तर धाराशिवचे जिल्हाध्यक्ष विलास कांबळे यांच्यासह पदाधिकारी व कृषी सहायक मोठ्या संख्येने सहभागी झाले होते.