Dharashiv News : धाराशिव जिल्ह्यात सुरुवातीपासूनच दमदार पावसाने हजेरी लावली असून यंदा सरासरीपेक्षा अधिक पावसाचा अंदाजही हवामान विभागाने वर्तवला आहे. या पार्श्‍वभूमीवर काही भागांत शेतकऱ्यांनी पहिल्याच पावसानंतर धाडस दाखवत ऊसलागवड हाती घेतली आहे. गेल्या वर्षी कमी पावसामुळे ऊस मोडलेले शेतकरी पावसानंतर लागवडीसाठी पुढे येत असून काही भागांत खरिपाच्या पेरण्या तर काही भागात ऊस लागवडीची लगबग दिसून येत आहे.

सध्या येडशी, कसबे तडवळे व ढोकी परिसरात हे चित्र दिसून येत आहे. जिल्ह्यात गेल्या पाच वर्षांत जोरदार पाऊस झाला नाही. बागायती क्षेत्रातही उसाचे पीक कमी झाले. बागायतदार शेतकऱ्यांचे मुख्य पीक हे ऊस असल्याने चांगला पाऊस न झाल्याने त्यात वाढ झाली नाही. गेल्या वर्षी तर तुलनेने कमी पाऊस झाला.

त्यामुळे आहे तो ऊस मोडावा लागला. यंदा पावसाळ्याच्या सुरुवातीपासूनच दमदार पाऊस झाला. जिल्ह्यातील सर्व भागांत सारखा पाऊस झाला. यामुळे शेतकरी सुखावले. भूजलाची पातळी वाढून विहिरींनाही पाणी आले. यामुळे शेतकऱ्यांनी ऊस लागवडीसाठी पुढाकार घेतला. हवामान विभागानेही यंदा चांगला पाऊस होणार असल्याचा अंदाज वर्तवल्यामुळे शेतकऱ्यांनी ऊस लागवडीचा धोका पत्करला आहे.

कसबे तडवळे, येडशी व ढोकी परिसरात वीस किलोमीटरच्या अंतरात तीन साखर कारखाने तसेच चार गूळपावडर निर्मिती कारखाने आहेत. गेल्या वर्षी या कारखान्यांमध्ये उसाला दर देण्यासाठी स्पर्धा लागली होती. गेल्या वर्षी उसाला चांगला भाव मिळाला. यामुळेच शेतकऱ्यांनी जास्त विचार न करता ऊस लागवडीला सुरुवात केल्याचे चित्र आहे.