Alibaug Rain News : समुद्रातील पाण्याचा रंग बदलू लागला, लाटांचा वेग वाढू लागल्याने मॉन्सूनचे आगमन काही दिवसांतच होणार असल्याचे संकेत मिळू लागले आहेत. त्‍यामुळे मासेमारी नौका किनाऱ्यावर विसावू लागल्‍या आहेत. पावसाचे आगमन होताच खोल समुद्रातील मासेमारीचा हंगाम संपणार आहे. त्‍यामुळे मच्छीमारांना आवराआवर सुरू केली आहे.

पावसाच्या आगमनाची चाहूल सर्वांत आधी मच्छीमारांना लागते, त्‍यामुळे नौका बंदरातून बाहेर काढण्यात आल्‍या असून, सुरक्षितस्‍थळी नांगरून, शाकारून ठेवण्यात येत आहेत.

दोन महिने मासेमारी बंद राहणार असल्याने नौकांवरील खलाशी, कामगार सुटीवर जाण्याची तयारीत आहेत. यंदा तापमानाचा पारा वाढला असला, तरी पाऊस लवकर सुरू होईल, असा अंदाज मच्छीमारांकडून वर्तविण्यात येत आहे.

पावसाच्या सुरुवातीचा कालावधी मत्स्यजीवांच्या प्रजननासाठी योग्य असतो. या दरम्यान मासेमारी केल्यास मत्स्यजीवांची संख्या घटत असल्‍याने दरवर्षी १ जून ते ३१ जुलै या कालावधीत राज्याच्या किनारपट्टीवर सक्तीची मासेमारी बंदी लागू करण्यात येते. यासंदर्भातील सूचना मत्स्य व्यवसाय विभागाने मच्छीमार संस्थांना दिल्या आहेत.

बंदीची सक्तीने अंमलबजावणी

बंदीचे उल्लंघन करणाऱ्या मच्छीमारांवर महाराष्ट्र सागरी मासेमारी अधिनियमातील तरतुदीनुसार कायदेशीर कारवाईचे संकेत मत्स्य व्यवसाय विभागाने दिले आहेत. या कालावधीत १२ सागरी मैलापर्यंत यांत्रिकी पद्धतीने मासेमारी करणाऱ्या मच्छीमारांना कोणत्याही योजनांचा लाभ राज्य सरकारकडून नाकारण्यात आला आहे.

यामुळे रायगड जिल्ह्यातील मच्छीमारांनी बंदीचा सक्तीने पालन करण्याचे ठरविले आहे. पावसाळ्यात होणारी मासेमारी बंदी ही फक्त यांत्रिकी मासेमारी करण्याऱ्या नौकांना लागू आहे. पारंपरिक पद्धतीने मासेमारी करणाऱ्या बिगर यांत्रिकी नौकांना ही बंदी लागू राहणार नाही.