Kolhapur News : आजरा तालुक्यात बांबू चळवळीचा पाया विस्तारत चालला आहे. या चळवळीला शेतकऱ्यांकडून सकारात्मक प्रतिसाद मिळत आहे. येथे नुकत्याच झालेल्या शेतकरी प्रशिक्षण कार्यशाळेत बांबूमध्ये गटशेती व्हावी, अशीच अपेक्षा बांबू तज्ज्ञांकडून व्यक्त केली गेली. क्लस्टर आधारित दृष्टिकोनातून ही चळवळ पुढे जाऊ शकते याचा पुरस्कार करण्यात आला.

आजऱ्यातील बांबू उत्पादक शेतकरी प्रशिक्षण कार्यशाळेला कोकणातून राजापूर, सांगली, पुणे यासह जिल्ह्यातील वेगवेगळ्या तालुक्यांतून दोनशेहून अधिक शेतकरी सहभागी झाले होते.

या कार्यशाळेच्या पहिल्या सत्रात बांबूतज्ज्ञ अरुण वांद्रे यांनी बांबू लागवड तंत्रज्ञान या विषयावर मार्गदर्शन करत व्यावसायिक बांबू लागवडीसाठी उपयुक्त बांबूच्या प्रजातीची ओळख करून दिली. बांबू लागवडीचे महत्त्व विशद केले.

याबरोबरच बांबूची चळवळ ही गतिमान करण्यासाठी अवलंबलेला आजरा तालुक्यातील शेतकऱ्यांचा गटशेतीचा प्रयोग हाच उपयोगी ठरणार आहे. गटशेतीच्या माध्यमातून शेतकरी बांबू लागवड व बांबू प्रक्रिया उद्योगातून यशस्वी होतील, असा विश्वास व्यक्त केला.

दुसऱ्या सत्रात बांबू तज्ज्ञ आणि उद्योजक अशपाक मकानदार यांनी बांबूपासून तयार होणाऱ्या अनेक वस्तूंबाबत माहिती दिली. बांबू लागवडीबरोबरच बांबूवर प्रक्रिया करणारे उद्योग शेतकऱ्यांनी उभे केल्यास मूल्यवर्धन होऊन अधिकचा नफा शेतकऱ्यांना होऊ शकतो, याची खात्री दिली. याला गटशेतीच पर्याय असल्याचे नमूद केले.

दृष्टिक्षेप

आजऱ्यात बांबूलागवड क्षेत्र (पारंपरिक बांबू लागवड) २ हजार हेक्टर

व्यावसायिक बांबूलागवड ७० हेक्टर

वार्षिक उलाढाल १२० कोटी रुपये

बांबूचे उत्पादन होणाऱ्या गावांची संख्या ४०

बांबू खरेदी-विक्री केंद्र, अगरबती तयार करणारे उद्योग व कुटीर उद्योग