Pune News:अहमदाबादहून लंडनकडे जाणाऱ्या एअर इंडियाच्या प्रवासी विमानाचा आज दुपारी मेघानीनगर परिसरात अपघात झाला. हे बोईंग ७८७ ड्रीमलायनर विमान सरदार वल्लभभाई पटेल आंतरराष्ट्रीय विमानतळावरून उड्डाण केल्यानंतर काही वेळातच अपघात झाला.अपघातानंतर मोठा स्फोट झाला असून, २४२ प्रवासी असल्याची माहिती सुत्रांकडून मिळत आहे. 

ही दुर्घटना गुजरातमधील अहमदाबाद शहरातील मेघानीनगर या दाट लोकवस्ती असलेल्या भागात घडली. हे ठिकाण सरदार वल्लभभाई पटेल आंतरराष्ट्रीय विमानतळापासून सुमारे १५ किलोमीटर अंतरावर आहे.

हे विमान लंडनला जाण्यासाठी आज दुपारी १ वाजून ३१ मिनिटांनी अहमदाबाद येथून उड्डाण घेतले होते. मात्र, उड्डाणानंतर अवघ्या सात-आठ मिनिटांत, म्हणजे १ वाजून ३८ मिनिटांनी मेघानीनगर परिसरात हे विमान कोसळले.

अपघात घडताच परिसरात मोठा आवाज झाला आणि धुराचे लोट दिसून आले. सध्या घटनास्थळी बचावकार्य सुरू आहे. अग्निशमन दलाच्या गाड्या दाखल झाल्या असून आग विझवण्याचे व बचावकार्य सुरू आहे. प्रवाशांच्या सुरक्षिततेबाबत कोणतीही अधिकृत माहिती मिळालेली नाही.

या विमानात एकूण २४२ प्रवासी तर १० क्रु मेंबर प्रवास करत असल्याची माहिती समोर आली आहे. अपघाताचं नेमकं कारण अद्याप स्पष्ट नाही. परंतू प्राथमिक माहितीनुसार अपघातावेळी विमानाच्या इंधन टाक्या पूर्णपणे भरलेल्या असल्याने मोठ्या प्रमाणावर स्फोट होऊन आग लागली असावी.  त्यामुळे या परिसरात मोठे नुकसान होऊन अनेक वाहने जळून खाक झाली आहे.

घटनेची माहिती मिळताच अहमदाबाद अग्निशमन दलाच्या गाड्या तातडीने घटनास्थळी दाखल झाल्या असून, आग विझवण्याचे आणि बचावकार्य सुरू आहे. आग आटोक्यात आणण्याचे प्रयत्न सुरू असून परिसरात पोलिसांनी नाकाबंदी केली असून, रुग्णवाहिका आणि आपत्कालीन सेवा तातडीने दाखल झाल्या आहेत. पुढील सुचना मिळेपर्यंत आता हे विमानतळ बंद ठेवण्यात येणार आहे.