Sindhudurg News : सिंधुदुर्ग कृषी उत्पन्न बाजार समिती नांदगाव येथे चार एकरमध्ये मार्केट यार्ड उभारणार असून चार हेक्टर जमिनीच्या खरेदीची प्रक्रिया पूर्ण झाली आहे. पुढील वर्षभरात तेथे मार्केट यार्ड उभारण्याचा बाजार समितीचा प्रयत्न आहे.

सिंधुदुर्ग जिल्ह्यात मार्केटयार्ड नसल्यामुळे हा जिल्हा पूर्णपणे भाजीपाला, विविध फळे आणि इतर सर्वच गोष्टी कोल्हापूर, बेळगाव जिल्ह्यांवर अवलंबून आहे. सिंधुदुर्ग जिल्ह्यात आंबा, काजू, कोकम, नारळ, सुपारी यांसह विविध पिके घेतली जातात. याशिवाय जिल्ह्यात मासेमारी मोठ्या प्रमाणात होते. याशिवाय काही भागात भाजीपाला उत्पादन देखील घेतले जाते. परंतु शाश्वत बाजारपेठ नसल्यामुळे शेतकऱ्यांपुढे मालविक्रीचा प्रश्न होता.

जिल्ह्यातील शेतकऱ्यांना भेडसावणारा हा प्रश्न कायमस्वरूपी सुटावा या हेतूने जिल्हा कृषी उत्पन्न बाजार समिती गेले वर्ष दीड वर्ष जिल्ह्यात सुसज्ज मार्केटयार्ड निर्माण व्हावे यासाठी प्रयत्नशील होते.

दरम्यान, आता कणकवली तालुक्यातील नांदगाव रेल्वे स्थानकालगत बाजार समितीने चार हेक्टर जमीन खरेदी केली आहे. या चार हेक्टरमध्ये मार्केट यार्ड उभारले जाणार आहे. मार्केट यार्डचा आराखडा देखील तयार करण्यात आला आहे. या मार्केट यार्डचे लवकरच भुमिपुजन करून वर्षभरामध्ये मार्केटयार्ड उभारण्याचा बाजार समितीचा प्रयत्न आहे.