Bhayndar News : मिरा-भाईंदर शहराला पाणीपुरवठा करणाऱ्या स्टेम प्राधिकरण व एमआयडीसी या दोघांकडूनही मंजूर कोट्यापेक्षा कमी पाणी दिले जात आहे. एकीकडे शहराची लोकसंख्या वाढत असल्याने पाणी कमी पडत आहे. असे असताना दोन्ही स्त्रोतांकडून पाणीपुरवठा कमी होत असल्याने शहराच्या पाणीपुरवठ्याच्या वेळापत्रकावर मोठा परिणाम होऊ लागला आहे.

स्टेम प्राधिकरणाकडून ८६ दशलक्ष लिटर आणि एमआयडीसीकडून १२५ दशलक्ष लिटर पाण्याचा कोटा मिरा-भाईंदरसाठी मंजूर आहे. परंतु, स्टेमकडून दररोज ७५ दशलक्ष लिटर, तर मआयडीसीकडून ११७ दशलक्ष लिटर एवढेच पाणी शहराला दिले जात आहे.

त्याचा शहरातील पाणीपुरवठ्याच्या वेळापत्रकावर मोठा परिणाम होत असून, नागरिकांना ३६ ते ४० तासांनी पाणी मिळत आहे. भिवंडी, ठाणे व मिरा-भाईंदर या तीन महापालिकांचे मिळून स्टेम प्राधिकरण स्थापन करण्यात आले आहे. स्टेमकडून ८६ दशलक्ष लिटर पाणी मंजूर असले, तरी दररोज ८० दशलक्ष लिटर पाणी मिळणे अपेक्षित आहे.\

स्टेम, एमआयडीसीच्या शटडाऊनमध्ये टंचाई

दुसरीकडे मिरा-भाईंदरची पाण्याची स्थिती लक्षात घेऊन शहराला दररोज १२० दशलक्ष लिटर पाणी देण्याचे आदेश दोन महिन्यांपूर्वी उद्योगमंत्री उदय सामंत यांनी एमआयडीसीच्या अधिकाऱ्यांना दिले होते. त्यानुसार मिरा-भाईंदरला केवळ एक दिवस १२० दशलक्ष लिटर पाणी मिळाले. मात्र, त्यानंतर दररोज ११७ दशलक्ष लिटर पाणीच दिले जात आहे.

स्टेम व एमआयडीसी या दोन्ही स्त्रोतांकडून दररोज सुमारे आठ ते १० दशलक्ष लिटर पाणी कमी मिळत आहे. त्यामुळे आधीच पाण्याचा तुटवडा असलेल्या शहरातील पाणीपुरवठ्याचे गणित बिघडत आहे. त्यात दोन्ही स्त्रोतांपैकी एकाने शटडाऊन घेतला, तर शहरात दोन ते तीन दिवस पाणी टंचाई निर्माण होते.