Aurangabad News : शासनाच्या कृषी विभागाच्या वतीने प्रति थेंब अधिक पीक, सूक्ष्म घटकासाठी प्रधानमंत्री कृषी सिंचन योजनेअंतर्गत शेतकऱ्यांना ठिबक, तुषार या सिंचनाच्या साधन उपलब्धीसाठी निधी उपलब्ध करून दिला जातो.

दरम्यान शेतकऱ्यांनी खरेदी केलेल्या मागील दोन वर्षातील सूक्ष्म सिंचनाचे अनुदान नऊ कोटी दहा लाख रुपये अद्याप थकित आहेत. याशिवाय मुख्यमंत्री कृषी सिंचन योजनेअंतर्गत शेतकऱ्यांना २५ टक्के वाढीव अनुदानाची जाफराबाद तालुक्याची दोन कोटी ४८ लाख रुपये थकित असल्याने शेतकऱ्यांना अडचणी निर्माण होत आहेत.

कृषी विभागाच्या वतीने खरीप व रब्बी हंगामात पिकांना सूक्ष्म सिंचनाद्वारे पाणी देता यावे म्हणून महाडीबीटी या कृषी विभागाच्या वेबसाइटवर ऑनलाइन अर्ज मागून लकी ड्रॉद्वारे लाभार्थी शेतकरी निवडले जातात. जाफराबाद तालुक्यामध्ये २०२२- २३ मध्ये निवडलेल्या १०५ लाभार्थी शेतकऱ्यांचे ३१ लाख ५० हजार अनुदान थकले आहे. तर २०२३- २४ या वर्षी अनुदानास पात्र ठरलेल्या २५१९ लाभार्थ्याचे आठ कोटी ७९ लाख रुपये अनुदान थकलेले आहे.

यामुळे शेतकऱ्यांना ही रक्कम त्वरित वितरित केली जावी अशी मागणी होत असली तरी २०२४ - २५ वर्ष सुरू झाले तरी अद्याप मागील अनुदानाची रक्कम शेतकऱ्यांना प्राप्त झाली नाही. दरम्यान चालू वर्षासाठी शेतकऱ्यांनी महाडीबीटी या पोर्टलवर सूक्ष्म सिंचनासाठी अर्ज सादर केलेले आहेत. परंतु शेतकऱ्यांना अद्याप पूर्वसंमती मिळालेली नाही. खरिपाची लागवड झाली तरी तुषार, ठिबक सिंचन खरेदीसाठी शेतकऱ्यांना पूर्वसंमती नसल्याने शेतकरी अडचणीत सापडला आहे.