Nanded News : आगामी खरीप हंगामासाठी शासनाने हायब्रीड कपाशी बीजी टू वाणांचे दर जाहीर केले आहेत. प्रति पाकीट ८६४ रुपयाने विक्री करण्याचे निर्देश शासनाकडून मिळाल्यामुळे कृषी निविष्ठा विक्रेत्याकडून करून अधिक दराने कपाशी बियाणाची विक्री होत असल्यास कृषी विभागाकडे तक्रार करण्याचे आवाहन कृषी विभागाच्या जिल्हा गुणनियंत्रण शाखेकडून केले आहे.

आगामी खरीप हंगामात जिल्ह्यात दोन लाख दहा हजार हेक्टरवर कपाशीची लागवड होण्याचा अंदाज कृषी विभागाने व्यक्त केला आहे. यानुसार जिल्ह्याला लागणाऱ्या साडेदहा लाख कपाशी पॉकेटचे नियोजन करण्यात आले आहे. विविध बियाणे उत्पादक कंपन्यांकडूनही जिल्ह्याच्या ठोक विक्रेत्यांकडे सध्या कपाशी बियाणे पुरवठा होत आहेत.

परंतु काही ठराविक कपाशी वाणांना अधिकचे रुपये दराने विक्री होत असल्याच्या तक्रारी मागील अनेक दिवसांपासून येत होत्या. यामुळे केंद्र शासनाने कपाशी बीजी टू या हायब्रीड वाणांच्या शेतकऱ्यांना विक्रीचे दर ता. सात जूनच्या राजपत्रात जाहीर केले आहेत. यानुसार आता शेतकऱ्यांनी सर्वच प्रकारच्या कपाशी बियाणांसाठी अधिकचे पैसे मोजण्याची गरज नाही.

शासनाच्या निर्देशानुसार कृषी निविष्ठा विक्रेत्यांनी प्रति पॉकिट ८६४ दराने विक्री करण्याचे निर्देश दिले आहेत. त्यामुळे कृषी विभागाच्या जिल्हा गुण नियंत्रण निरीक्षक शाखेकडून शेतकऱ्यांना कपाशी बियाणे ८६४ दरानेच विकत घेण्याचे आवाहन केले आहे. या दरापेक्षा अधिक दराने बियाणे विक्री करत असलेल्या कृषी निविष्ठा विक्रेत्यांची तक्रार संबंधित कृषी सहायक, मंडळ कृषी अधिकारी, तालुका कृषी अधिकारी, जिल्हा अधीक्षक कृषी अधिकारी कार्यालयाकडे लेखी स्वरूपात करण्याचे आवाहन जिल्हा अधीक्षक कृषी अधिकारी भाऊसाहेब बऱ्हाटे यांनी केले आहे.