Satara News : केंद्राने सहा वर्षांत एफआरपी वाढवली; पण त्याच्याबरोबर बेस उतारा वाढविल्यामुळे सध्या १०.२५ उताऱ्यामुळे तीन हजारांच्या जवळपास दर मिळत आहे. ऊसदर ठरवताना मूळ उतारा १०.२५ ऐवजी पूर्वीप्रमाणे ८.५० धरावा. पूर्वीच्या बेसनुसार शेतकऱ्यांना प्रतिटन ३७०० रुपये ऊसदर मिळेल, अशी मागणी ऊस नियंत्रण मंडळाचे शेतकरी प्रतिनिधी सचिन नलवडे यांनी केली.

ऊसदर किमतीचे धोरण ठरवण्यासाठी केंद्रीय कृषी खर्च, किंमत आयोगाचे अध्यक्ष विजय शर्मा यांच्या अध्यक्षतेखाली आणि साखर आयुक्त चंद्रकांत पुलकंदवार यांच्या उपस्थितीत राज्यातील प्रगतिशील शेतकरी व ऊस नियंत्रण मंडळाचे सदस्य यांच्यासोबत बैठक झाली. त्यामध्ये श्री. नलवडे यांनी ही मागणी केली.

ते म्हणाले, ‘‘वाढलेला तोडणी वाहतूक खर्च शेतकऱ्यांच्या एफआरपीतून वजा होत आहे. त्यामुळे मूळ एफआरपी वाढली नसल्याचे दिसत आहे. उसाच्या पदार्थातील नफ्याचा वाटा हा सी. रंगराजन समितीनुसार मळी, बगॅस, मोलॅसिस एवढ्याच प्राथमिक उपपदार्थापुरता मर्यादित आहे.

उपपदार्थातील नफा शेतकऱ्यांना वाटण्याचे सूत्र बदलून त्यामध्ये इथेनॉल, कोजनरेशन, अल्कोहोल, स्पिरीट व अन्य उपपदार्थांचा समावेश करावा. त्यामुळे शेतकऱ्यांना ३०० ते ४०० रुपये जास्तीचे मिळतील.’’

चार हजार दर मिळावा

कोपर्डे हवेलीचे शेतकरी सुदाम चव्हाण यांनी शेतीचा एकरी खर्च सव्वा लाखाच्या पुढे गेला असून, अठरा महिन्यांनी शेतकऱ्यांना उसातून मिळणारा नफा हा फक्त २५ हजार रुपये म्हणजे महिन्याला १५०० रुपये मिळतो. तो शेतमुजरापेक्षा कमी आहे. त्यामुळे उसाला चार हजार दर मिळावा, अशी मागणी केली.